واضح رہے کہ بیع کے صحیح ہونے کےلیے یہ ضروری ہے کہ مبیع متعین ہو،مقدور التسلیم ہو اور مبیع میں ایسی جہالت نہ ہوجو تنازع کا سبب بن سکے،اور اگر مبیع میں ایسی  جہالت ہو جو تنازع کا سبب بن سکےتو وہ بیع صحیح نہیں ہوگی۔

لہذا صورت مسئولہ میں اگر چہ بلاک تو متعین ہے لیکن بلاک کے اندر پلاٹ  کے مقام کا پتہ نہیں ہے کہ وہ آگے ہے،پیچھے ہے،درمیان میں ہے،کشادہ گلی میں ہے یا تنگ گلی  میں ہے  یہ ساری  ایسی چیزیں ہیں  جو تنازع کا سبب بن سکتی ہیں کیونکہ زمین کے اطراف قیمت کےاعتبار سے مختلف ہو تے ہیں  بعض اطراف کی قیمت زیادہ ہوتی ہے اور بعض کی کم ،اس وجہ سے اس طرح کے فائلوں کی خرید وفروخت جائز نہیں ہے،جہاں کہیں اس طرح کا عقد ہو چکا ہوتو فاسد ہونے کی وجہ سے مشتری اور بائع دونوں کےلیے ضروری ہے کہ اس عقد کو فسخ کریں ،لیکن اگر فسخ کرنا ممکن نہ ہو  تو   اللہ تعالی سے اس بیع پرمعافی مانگیں اور مشتری پلاٹ کے فائل کو اس وقت تک آگے فروخت نہیں کر سکتا جب تک پلاٹ نمبر اور اس  کی  حدود  وغیرہ  مکمل طور پر واضح نہ ہوجائیں  ۔

ووجه كون الموضع مجهولا أنه لم يبين أنه من مقدم الدار، أو من مؤخرها، وجوانبها تتفاوت قيمة فكان المعقود عليه مجهولا جهالة مفضية إلى النزاع، فيفسد كبيع بيت من بيوت الدار كذا في الكافي عزمية.(رد المحتار على الدر المختار،مطلب مهم في أحكام النقود إذا كسدت،ج:4،ص:545)

وأما شرائطه فاثنان أحدهما القبض فلا يثبت الملك قبل القبض لأنه واجب الفسخ رفعا للفساد وفي وجوب الملك قبل القبض تقرر الفساد۔(بدائع الصنائع، كتاب البيوع، فصل في حكم البيع،ج:7، ص:377)