واضح رہے کہ پنشن حکومت کی جانب سے سرکاری ملازم کے لیے عطیہ ہوتی ہے جو اس کی زندگی میں اس کو ملتی رہتی ہے اور اس کی وفات کے بعد قوانین کے مطابق یہ پنشن کسی وارث کے نام کر دی جاتی ہے چونکہ یہ عطیہ ہے اس لیے اس میں میراث کے احکام جاری نہیں ہوتے کیونکہ میراث اس مال میں جاری ہوتی ہے جو وفات کے وقت میت کی ملکیت میں موجود ہو۔

             صورت مسؤلہ میں جو پنشن اس عورت کی زندگی میں اس کے اکاؤنٹ میں آئی ہے وہ اس کی ملکیت تھی لہذا اس میں میراث کے احکام جاری ہونگے جب کہ اس کی وفات کے بعدقانونی لحاظ سے اس کا پنشن کا حق ختم ہو گیا ہے اس لیے حکومت اور بینک کو لا علم رکھ کر پنشن وصول کرنا جائز نہیں ہے۔ لہذا پسماندگان کے لیے ضروری ہےکہ حکومت کو اس عورت کی وفات کی صحیح خبر دیں، پھر حکومتی قوانین کے مطابق جس کے نام یہ پنشن جاری کر دی جائے تو یہ اس کا حق ہوگا، دیگر ورثا اس میں شریک نہیں ہونگے۔ اور اگر قوانین کے مطابق کوئی اور اس کا مستحق نہ ہو بلکہ اس کو بند کیا جائے تو ایسی صورت میں مرحومہ کی وفات کے بعد جتنی رقم آئی ہے وہ سرکاری خزانہ کو واپس کرنا ضروری ہوگا۔

العطاء لا يورث كذا في صلح البزازية۔ (شرح الأشباه والنظائر، ج:2، ص:495)

التركة فی الإصطلاح ما تركه المیت من الأموال صافيا عن تعلق حق الغير بعين من الأموال۔ (رد المحتار، كتاب الفرائض، ج:10، ص:493)