واضح رہے کہ شرعاًہر شخص  زندگی میں اپنی مملوکہ جائیداداورمال ومتاع میں خودمختار ہوتا ہے ۔اس میں جس طرح چاہے ہر جائز تصرف کرسکتا ہے اس لیےاگر کوئی باپ بحالت ہوش وحواس  زندگی میں اپنی  جائیداد میں سے  کچھ حصہ  یا نقدی رقم  وغیرہ اپنی اولاد کو دے دے تو شرعاً یہ ہبہ کہلاتا ہے ہبہ کے تام ہونے کے لیے ضروری ہےکہ واہب موہوبہ چیز سے اپنا تصرف مکمل طور پر ختم کرکےموہوب لہ کے  قبضے اوراس کے تصرف میں دےدے،قبضہ کے بعد شی موہوبہ  موہوب لہ کی ملکیت میں آجائے گی،البتہ میراث  مرنے کے بعد  ترکہ میں جاری ہوتاہے،اس لیے اگر کوئی شخص اپنی زندگی  میں   کوئی چیز کسی وارث کو  ہبہ کردے  تووارث موہوبہ چیز پر قبضہ  کرنے کےباوجود  میراث سے محروم نہ ہوگابلکہ   دیگرورثا کے ساتھ اپنے حصے کے بقدر میراث  کا حقدار ہوگا۔

                   صورت مسؤلہ کے مطابق اگر باپ  اپنی   بیٹیوں کو  کچھ حصہ جائیداد اور نقدی وغیرہ دےدے تو اس سے بیٹیوں  کا حق میراث  ختم  نہیں  ہوگا  بلکہ   باپ کے مرنے کےبعدحقوق متقدمہ علی الارث کی ادائیگی کے بعد جو مال بچ جائے گا،اس میں  بیٹیاں  دیگر  ورثا کے ساتھ اپنے حصے کے بقدر  حقدار ہوں گی ۔

تنعقد الهبة بالإيجاب والقبول،وتتم بالقبض۔(شرح المجلة لسليم رستم باز،المادة:837، ص:462)

الإرث يثبت بعد موت المورث ۔(البحرالرائق،كتاب الفرائض، ج:9، ص364)