کسی بھی شعبہ کے انجینئر کو  اس شعبہ کی تعلیم مکمل کرنے کے بعد سرٹیفکیٹ جاری کیا جاتا ہے جو اس کی صلاحیت، قابلیت اور مہارت کا سرٹیفکیٹ ہوتا ہے،اپنا یہ سرٹیفکیٹ کسی کمپنی کو  کرایہ پر دینا جائز نہیں ہے، اس کے ناجائز ہونے کی چند وجوہات درج ذیل ہیں:

1۔  مذکورہ انجینئر کو اس کی صلاحیت اور تعلیم کی بنیاد پر کنسٹرکشن انجینئر کی سند دی گئی ہے، اگر اس سند کو دکھا کر کوئی غیر تربیت یافتہ اور غیر تعلیم یافتہ شخص آرڈر حاصل کرلے تو اس میں اس کے کام کو صحیح طرح نہ کرنے کی وجہ سے لوگوں کی جانوں کا خطرہ لاحق ہوسکتا ہے۔

2۔ حکومت کی طرف سے قانوناً اس کی پابندی ہے، اور حکومت کی ایسی جائز پابندیاں جو مفادِ عامہ کی مصلحت میں ہوں ان کی پاسداری شرعاً بھی لازم ہوتی ہے۔

3۔  اس میں دھوکادہی اور جھوٹ  میں تعاون پایا جاتا ہے جوکہ ناجائز اور حرام ہے ۔

4۔  لائسنس حکومت کی طرف سے اجازت نامہ ہے، کوئی ایسا مال نہیں ہے جس کو کرایہ پر دیا جاسکے یا فروخت کیا جاسکے۔

لہذا  صرف لائسنس (انجینئرنگ کارڈ)  کرایہ پر دینا اور لینا اور اس کی آمدنی  ناجائز ہے۔

قال الله تعالی: ﴿وَلَا تَعَاوَنُوا عَلَى الْإِثْمِ وَالْعُدْوَانِ﴾ (سورةالمائدة، آيت نمبر:2)

وقال: ﴿وَاجْتَنِبُوا قَوْلَ الزُّورِ﴾ (سورة الحج، آيت نمبر:30)

والأجرة انما تكون في مقابلة العمل. (ردالمحتار على الدر المختار،كتاب النكاح،مطلب:أنفق على معتدةالغير،ج:4، ص:305)

تصرف الإمام على الرعية منوط بالمصلحة۔(الأشباه والنظائر لابن نجيم، القاعدة الخامسة، ص:62)

وبهذا علم أن أمر القاضي لا ينفذ إلا إذا وافق الشرع. (شرح الأشباه والنظائر، القاعدة الخامسة، ص:333)