واضح رہے کہ نکاح صرف طبعی خواہش کی تکمیل ہی نہیں بلکہ ایک عبادت بھی ہے اس لیے اس میں شرعی اصول کی پاسداری نہایت ضروری ہے اور کسی ناجائز رسم و رواج کی بنا پر اس کو شریعت کے اصول سے متصادم بنانا درست نہیں۔مثلا  نکاح کے بدلے لڑکے کے والدین سے مہر کے علاوہ اپنے لیے  اضافی رقم کا مطالبہ ایک ناجائز عمل ہے۔ عموما ایسی صورت میں لڑکا یا اس کے والدین مجبور ہوکر بادلِ نا خواستہ رقم ادا کرتے ہیں کیونکہ اس کے بغیر معاشرے  میں کوئی اس کو رشتہ دینے پر آمادہ نہیں ہوتابعض لوگ اس آمدنی کو مہر کا نام دے کر دوسرے کے مال کو ہڑپ کرنے کے لیے حیلہ کرتے ہیں کہ یہ مہر ہے اور بیٹی کی رضامندی سے ہمارے لیے اس کا استعمال جائز ہےجبکہ حقیقت میں یہ ایک نام کا حیلہ ہے جس سے مقصود رقم کا حصول ہے نہ کہ مہر کا تقرر، فقہائے کرام نے اسے رشوت قرار دیا ہے اس کو واپس کرنا ضروری ہے۔ تاہم اگر لڑکی کے والدین مہر کے طور پر رقم مقرر کر کے نکاح کے بعد رخصتی سے قبل وہ رقم وصول کریں اور اس رقم سے لڑکی کی اجازت سے اس کے لیے جہیز وغیرہ کا سامان خرید لیں تو شرعاً اس کی گنجائش ہے۔  

                   صورتِ مسئو لہ میں مذکورہ رقم اگر نکاح سے پہلے رضامندی ظاہر کرنے کی غرض سے لیے جاتے ہوں تو ان کا دینا اور لینا جائز نہیں اور اگر کسی نے بامر ِ مجبوری دے دیے ہوں تو لینے والے پر اس کی واپسی لازمی ہے لیکن دینے والا  اگر موجود نہ ہو تو اس کے  ورثا کو ادا کرنا لازمی ہے ۔

وعن عائشة قالت : قال النبي صلى الله عليه و سلم : إن أعظم النكاح بركة أيسره مؤنة. رواهما البيهقي في شعب الإيمان.(مشكاة المصابيح،كتاب النكاح،ج:2،ص:202)

(أخذ أهل المرأة شيئا عند التسليم فللزوج أن يسترده) لأنه رشوة. (قوله عند التسليم) أي بأن أبى أن يسلمها أخوها أو نحوه حتى يأخذ شيئا، وكذا لو أبى أن يزوجها فللزوج الاسترداد قائما أو هالكا لأنه رشوة.(الدر المختار مع رد المحتار،كتاب النكاح،مطلب في دعوى الاب ان الجهاز عارية،ج:4،ص:307)

الرشوة لا تملك بالقبض.(الدر المختار،كتاب الحظر والاباحة،ج:9،ص:607)