واضح رہے کہ  شرعا زکوۃ اور صدقات واجبہ کی ادائیگی میں تملیک شرط ہے تملیک کے بغیر زکوۃ اور صدقات واجبہ کی ادائیگی درست  نہیں ہوتی اور نہ ہی زکوۃ دہندگان کی  ذمہ داری فارغ ہوتی ہے ۔دوسری بات یہ ہے کہ شرعا مدرسہ کے ذمہ داران زکوۃ دہندگان کے نمائندے ہوتے ہیں لہذا اگر زکوۃدہندگان نے مستحقین   میں سے مخصوص مصارف  میں زکوۃ وغیرہ کے رقوم  خرچ کرنے کی تعیین کی تو شرعا ان مصارف کے علاوہ میں یہ رقوم خرچ نہیں کیے جا سکتے، لیکن  اگر دینے والوں کی طرف سے کسی خاص مستحق زکوۃ مصرف کی تعیین نہ ہوتو  زکوۃ کے تمام مصارف میں شرعی اصولوں کی پاسداری کے ساتھ  یہ رقوم خرچ کئے جا سکتے ہیں۔

            لہذا صورت مسئولہ میں:(1)اگر زکوۃ دہندگان نے ادارے کے ذمہ دار کو مستحق زکوۃ مصرف میں زکوۃ و صدقات کے رقوم خرچ کرنے کی مطلق اجازت دی ہواور یا ان کو متعلقہ ادارے کے متعلق صورت حال  کا پتہ ہو کہ دینی اور عصری تعلیم والے دونوں قسم کے  مستحق طلبہ پریہ رقوم خرچ کیے جاتے ہیں تو  اس صورت میں زکوۃ کے یہ رقوم  عصری تعلیم والے طلبہ پر بھی خرچ کئے جا سکتے ہیں ۔تاہم محض کھانا کھلانے سے زکوۃ کی رقوم میں  تملیک کی ذمہ داری پوری نہیں ہوتی ۔البتہ تملیک کرانے کے بعد یہ رقوم کھانا کھلانے میں خرچ کیے جا سکتے ہیں۔

(2)اور اگر زکوۃ دینے  والوں نے صرف دینی طلبہ کے نام  زکوۃ و صدقات  کے رقوم دیے ہوں  تو اس صورت میں  تملیک کے ساتھ یہ رقوم انہی طلبہ پر خرچ کرنا ضروری ہوگا۔

وَأَمَّا رُكْنُ الزَّكَاةِ  فَرُكْنُ الزَّكَاةِ هو إخْرَاجُ جُزْءٍ من النِّصَابِ إلَى اللَّهِ تَعَالَى وَتَسْلِيمُ ذلك إلَيْهِ يَقْطَعُ الْمَالِكُ يَدَهُ عنه بِتَمْلِيكِهِ من الْفَقِيرِ وَتَسْلِيمِهِ إلَيْهِ۔(بدائع الصنائع،كتاب الزكوة،ج:2،ص:39)

وشرعا تمليك خرج الإباحة فلو أطعم يتيما ناويا الزكاة لا يجزيه إلا إذا دفع إليه المطعوم كما لو كساه بشرط أن يعقل القبض إلا إذا حكم عليه بنفقتهم(ردالمحتارعلی الدرالمختار،کتاب الزکوۃ،ج:2،ص:257)