جس عورت کا شوہر ایسا گم ہو جائے کہ بالکل زندگی اور موت کا پتہ ہی نہ چلے اور اِس سے مزید انتظار اور صبر نہ ہوتاہوتو ایسی مجبوری میں اِمام مالکؒ کے مذہب کے مطابق فتوی دیا جاتا ہے جس کا حاصل یہ ہے کہ یہ عورت مسلمان حاکم کی عدالت میں دعوی دائر کرے اور گواہوں کے ذریعے یہ ثابت کرے کہ فلاں شخص اِس کا شوہر ہے، پھر گواہوں ہی کے ذریعے اِس کا لاپتہ ہونا بھی ثابت کرے ، اِس تمام کاروائی کے بعد قاضی ہر ممکن صورت سے اِس شخص کی تفتیش و تلاش کروائے، جب قاضی اِس شخص کے ملنے سے بالکل ناامید ہو جائے تو عورت کو چار سال انتظار کرنے کا حکم دے، اگر اِن چار سالوں میں شوہر آجائے تو بہت خوب، ورنہ مدت پوری ہونے پر عورت دوبارہ عدالت میں درخواست پیش کرے جس پر قاضی شوہر کے مردہ ہونے کا فیصلہ سنا دے، اِس کے بعد عورت چار ماہ دس دِن عدت گزار کر دوسری جگہ نکاح کر سکتی ہے۔

         واضح رہے کہ جس عورت کا شوہر لاپتہ ہو اِس کے لیے قاضی کے فیصلے میں مزید چار سال کے انتظار کاحکم دیا جانا اِس صورت میں ہے جب کہ اِس عورت کو عفت اور پاک دامنی کے ساتھ یہ چار سال گزارنے کی قدرت ہو اور اِسی طرح اِس مدت میں اِس کے لیے نان و نفقہ کا بھی کچھ انتظام ( مفقود کے مال یا کسی عزیز وغیرہ کی کفالت کے ذریعے ) ہو، لیکن اگر عورت عصمت کو خطرہ لاحق ہونے کا اندیشہ ظاہر کرے تو ایسی صورت میں چار سال کی بجائے ایک سال انتظار کا حکم دیا جا سکتا ہے، اگرچہ یہ ایک سال عورت کے مقدمہ دائر کرنے سے شمار ہوگا۔ اِسی طرح اگر زنا میں مبتلا ہونے کا خطرہ تو نہیں لیکن مفقود کا اِتنا مال نہیں، جو اِن چار سالوں میں بیوی کے نان و نفقہ کے لیے کافی ہو تو اِس صورت میں کم از کم ایک سال کے انتظار کا حکم دیا جا سکتا ہے اور اِس مذکورہ صورت میں سال کی مدت پوری ہونے پر قاضی اِن کے مابین تفریق کر دے گا اور یہ تفریق طلاقِ رجعی ہو گی، لہذا مفقود کی بیوی کو عدتِ وفات کی بجائے عدتِ طلاق یعنی تین حیض گزانے ہوں گے اور اگر مفقود اِس دوران واپس آگیا اور عدت کے دوران اِس نے رجعت کر لی تو نکاح بدستور باقی رہے گا اور اگر عدت کے دوران آکر رجوع نہ کیا یا عدت کے بعد آیا تو بیوی بائنہ ہو کر خود مختار ہو جائے گی  خواہ دوبارہ اِس شوہر سے نکاح کرے یا دوسرے سے نکاح کرے۔

           لہذا صورتِ مسئولہ میں چونکہ عدالت میں یہ معاملہ تقریباً ساڑھے پانچ ماہ رہا اور اس کے بعد فیصلہ دیا گیا اور فیصلے میں چھ ماہ کی مدت عورت کو انتظار کےلیے دی گئی ہے۔لیکن چونکہ یہاں مالکیہ کے مذہب پر فتوی دیا گیا ہے تو اِن کی تمام شرائط کی رعایت ضروری ہے اِس لیے عدالت کے فیصلے کے بعد چار سال انتظار کرے اور اگر نان نفقہ کا بندوبست نہ ہو یا عصمت کو خطرہ لاحق ہونے کا اندیشہ ہو تو پھر مقدمہ دائر کرنے کے وقت سے اب تک ایک سال گزر جائے تو عدت گزارنے کے بعد اپنے لاپتہ شوہرکے بھائی سے یا دوسرے شخص سے نکاح کر سکتی ہے۔

قال مالك والأوزاعي: إلى أربعين سنين، فينكح عرسه بعدها كما في النظم، فلو أفتى به موضع الضرورة، ينبغي أن لا بأس به على ما أظن۔ (القهستاني، شمس الدين محمد، جامع الرموز، كتاب المفقود، ج:3، ص: 390)

ومذهب الحنفية في الباب، وإن كان قوياّ روايةّ و درايةّ، ولكن المتأخرين منا قد أجازوا الإفتاء بمذهب مالك عند الضرورة نظراّ إلى فساد الزمان۔ (إعلاء السنن، كتاب المفقود، باب إمرأته حتى ياتيها البيان، ج:13، ص:67)