واضح رہے کہ مبیع کے حصے بنا کر اسے متعدد افراد پر بیچنا اس طور پر کہ ہر ایک اس مبیع  کے ہرہر جزء میں اپنے حصے کے بقدر شریک ہو فقہاء  کی اصطلاح میں بیع المشاع کہلاتا ہے جو کہ جائز ہے۔ اسی طرح سے ایک شریک کا دوسرے شریک سے  اس کا حصہ کرایہ پر لینا  بھی جائز ہےالبتہ  اجارہ کی شرط پر بیع  کرنا درست نہیں تاہم اس بات کو اگر شرط نہ ٹہرایا  گیا ہو ، بلکہ صرف وعدہ کے طور پر ذکر کیا گیا ہو تو جائز ہے۔ اسی طرح   کرایہ پر لیا ہوا مکان یا دکان وغیرہ آگے کسی اور کو کرایہ پر دینا بھی جائز ہے اور  جب پہلے کرایہ دار نے اس میں اضافی مراعات شامل کرکے  کرایہ پردیا ہو  تو پھر اضافی کرایہ بھی وصول کرنا جائز ہوگا۔ اس کے علاوہ شیئرز  مالکان،  اگر اپنا حصہ بیچنا چاہیں توبیچ سکتے ہیں جس کے  خریدنے کا پہلا حق عمارت میں اس کے ساتھ جو شرکا ہیں ان کا ہوگا۔

                صورت مسئولہ میں مذکورہ عمارت کے شیئرز بناکر بیچنا درست ہے البتہ بیع میں یہ شرط نہ لگائی جائے کہ مالک ہی کو دوبارہ کرایہ پر دیا جائے گا اور بیع کامعاملہ طے ہونے کے بعد اگر مالک  کرایہ پر لے کر اس میں اضافی سہولیات فراہم کر کے آگے کسی کو زیادہ کرایہ پر دے تو یہ  جائز ہے اسی طرح عمارت کے شیئرز خریدنے والے چونکہ عمارت میں حصہ دار بن جاتے ہیں اس لیے جب بھی عمارت کی قیمت بڑھے گی تو ان کے حصہ کی قیمت بھی  زیادہ ہوگی ، اس کے علاوہ جب بھی شیئرز  مالکان اپنے حصوں کو بیچنا چاہیں تو خریدنے کا پہلا حق ان شرکاکا ہوگا جو ان کے ساتھ عمارت میں شریک ہیں۔

بخلاف المشاع؛ لأن المشاع محل للتملك ولهذا يجوز بيع المشاع.(الجوهرة النيرة، كتاب الهبة، ج:1، ص:326)

بيع المشاع جائز لا رهنه. (تنقيح الفتاوى الحامدية، كتاب الرهن، ج:6، ص:469)

وأجمعوا أنه لو آجر من شريكه يجوز سواء كان مشاعا يحتمل القسمة أو لا يحتمل وسواء آجر كل نصيبه منه أو بعضه كذا في الخلاصة.  (الفتاوى الهندية، كتاب الإجارة، الباب السادس، ج:4، ص:448)

أن الشريك أحق بالشفعة من صاحب الطريق؛ لأن الشريك في عين العقار أحق من الخليط. ( بدائع الصنائع في ترتيب الشرائع، كتاب الشفعة، سبب ثبوت حق الشفعة، ج:5، ص:9)