واضح رہے کہ ہر  شخص زندگی میں اپنی مملوکہ جائیداد کا خود مالک ہوتا ہے،اس لیے اس کی اولاد یا بیوی وغیرہ کو یہ حق حاصل نہیں کہ وہ اس سےاس کی زندگی میں حصۂ میراث کا مطالبہ کرے، تاہم اگر کوئی شخص  بیٹے کے مطالبہ کی وجہ سے اپنی زندگی میں  بحالت ہوش و حواس بیٹے کو جائیداد وغیرہ میں حصہ دے اور وہ بیٹا باپ کی زندگی میں اس پر قبضہ بھی  کرےتو شرعی نقطۂ نظر سے یہ ہبہ متصور ہوگا نہ کہ میراث۔

               صورت مسئولہ میں اگر  والد نے بیٹے سے معاہدہ کرکے  اسے اس کا مقررہ حصہ دیا ہو، اور بیٹے  نے اس پر قبضہ بھی کیا ہو تو یہ شرعا ہبہ متصور ہوگا میراث نہیں۔ لہٰذا اس حصے کی وجہ سے باپ کی وفات کے بعد اس کو ان کے حصۂ میراث سے محروم نہیں کیا جائےگا،تاہم اگر بیٹے نے باپ کی زندگی میں مذکورہ حصہ لیتے وقت معاہدہ میں اپنا حصۂ میراث نہ لینے کا وعدہ کیا ہو تو والد کی وفات کے بعد مذکورہ بیٹے کو  چاہیے کہ اپنا وعدہ پورا کرتے ہوئےمصالحت کےطور پر باپ کی میراث میں سے تھوڑا حصہ لے کر اپنے باقی حصہ سے دست بردار ہوجائے، البتہ یہ ان کی رضامندی  اور اختیار پر ہوسکتا ہے،دوسرے ورثا کے لیے جائز نہیں کہ وہ انہیں جبری طور پر ان کے حصۂ میراث سے محروم کریں۔

الإرث يثبت بعد موت المورث.(البحرالرائق، كتاب الفرائض،ج:9،ص:364)

قال النووي: أجمعوا على أن من وعد إنسانا شيئا ليس بمنهي عنه فينبغي أن يفي بوعده...فلو تركه فاته الفضل وارتكب المكروه كراهة شديدة۔(مرقاة المفاتیح، کتاب الأدب، باب المزاح، ج:9،ص:130)