شرعی نقطہ نظر سے مکان یا زمین  کسی کے نام صرف انتقال کرنے سے ہبہ تام نہیں ہوتا بلکہ ہبہ کے تام ہونے کی شرائط  میں سے  ایک شرط یہ بھی ہے کہ موہوب لہ( جس کو یہ چیز ہبہ کیا گیا ہو)کو ہبہ شدہ چیز پر قبضہ یا مکمل تصرف کا اختیار دیا جائے۔

             صورت مسئولہ میں اگر والدہ نے اپنی زندگی میں گھر کو سائل کے نام انتقال  کرکے اس کا قبضہ اور مالکانہ تصرف کے اختیارات بھی سائل کو دیے تھے  تو یہ گھر والدہ کی ملکیت سے نکل کر سائل کی ملکیت میں شمار  ہو گا،لیکن اگر والدہ نے اپنی زندگی میں سائل کے نام  گھر کا انتقال تو کیا تھا مگر قبضہ نہیں دیا  تھا،تو یہ گھر بدستور والدہ کی ملکیت ہو گا،اور والدہ کی  وفات کے بعد  تمام ورثا  اس میں حصہ دار ہوں گے ۔

لأن اللام للتمليك بخلاف جعلته باسمك فإنه ليس بهبة(وقوله: بخلاف جعلته باسمك) قال في البحر: قيد بقوله: لك؛ لأنه لو قال: جعلته باسمك، لا يكون هبة؛ ولهذا قال في الخلاصة: لو غرس لابنه كرما إن قال: جعلته لابني، يكون هبة، وإن قال: باسم ابني، لا يكون هبة۔(ردالمحتار على درالمختار، كتاب البهة، ج:5، ص:689،دارالكتب العلمية بيروت)

لا يثبت الملك للموهوب له إلا بالقبض هو المختار۔(الفتاوى الهندية، كتاب الهبة، الباب الثانى فيما يجوز من الهبة ومالا يجوز، ج:4، ص:378، دارالفكر)