جو شخص  نصاب(ساڑھے سات تولے سونے یا ساڑھے باون  تولے چاندی یا ان میں سے کسی ایک کے بقدر مالِ تجارت یا نقد مالیت )کا مالک  نہ ہو اس کو زکوۃ اور دیگر صدقات واجبہ  دیئے جا سکتے ہیں۔

    صورت ِمسؤلہ کے مطابق اپنے خاندان  کے صاحب ِنصاب  لوگو ں سے  زکوۃ کی رقم  اکٹھی کر کےمستحقِ زکوۃ رشتہ دارو ں میں تقسیم  کرنا زیادہ  افضل اور باعث ثواب ہے ۔تاہم فقہاے کرام ؒ کی تصریحات کے مطابق کسی ایک شخص کو اتنی زکوۃ دینا   جس سے وہ صاحب ِ نصاب  ہو جائے مکروہ ہے  لہٰذا مستحق کویک مشت  نصاب کی مقدار میں زکوۃ نہ دی جائے ،البتہ اگر کوئی مستحق ِزکوۃ  قرض دار ہو  یا  اس کے اہل و عیال زیادہ ہوں یا اس کو کوئی اور ضرورت در پیش ہو جس کو پورا کرنے کے لیے زیادہ رقم کی ضرورت ہو  تو  اس کو مد نظر رکھ کر نصاب کے برابر یا اس سے زیادہ  رقم دی جا سکتی ہے ۔

     زکوٰۃ کی رقوم وصول کرنے کے بعد سال کے دوران میں ہی مستحقین تک پہنچانا چاہیےکیونکہ اگر زکوٰۃ دینے والوں میں سےکوئی فوت ہوجا ئے اور اس کی رقم ابھی مستحق تک  نہ پہنچی ہوتو وہ اس کے ورثا کا حق بن جاتی ہے لہٰذا زکوٰۃ کی رقم وصول کرنے کے بعد مستحقین تک پہنچانے میں دیر نہیں کرنی چاہیے۔رشتہ دار مستحقین کو دینے سے جو رقم بچ جائے  وہ دیگر مستحقین میں تقسیم کر دی جائے،۔

وقيد بالولاد لجوازه لبقية الأقارب كالإخوة والأعمام والأخوال الفقراء بل هم أولى لأنه صلة وصدقة ۔(رد المحتار،كتاب الزكوة،باب المصرف ج3ص293)

( وكره إعطاء فقير نصابا ) أو أكثر ( إلا إذا كان ) المدفوع إليه ( مديونا و ) كان ( صاحب عيال ) بحيث ( لو فرقه عليهم لا يخص كلا ) أو لا يفضل بعد دينه ( نصاب ) فلا يكره۔(الدر المختار،كتاب الزكوة،ج3ص303)

قوله ( وندب إغناؤه عن السؤال ) وينبغي أن ينظر إلى ما يقتضيه الحال في كل فقير من عيال أو حاجة كدين وثوب قال في النهر واقتضى كلامه أن الكثير لواحد أولى من توزيعه على جماعة۔(حاشية الطحطاوي على مراقي الفلاح،باب المصرف،ص593)