جب کوئی شخص فوت ہوجائے اور وہ ترکہ میں مال وجائیداد چھوڑ دے تو شرعاً اس کے ترکہ کے ساتھ بالترتیب  چار حقوق متعلق ہوتے ہیں(1) سب سے پہلے تجہیز وتکفین اور دفن کے انتظام کے اخراجات  اعتدال کےساتھ اس سے ادا کیےجائیں گے۔(2)اس کے بعد بقیہ مال سے  میت کے ذمہ واجب الادا قرضوں کو ادا کیا جائےگا۔(3) اگر میت نے اپنی زندگی میں کوئی وصیت کی ہو تو باقی ماندہ مال کے ایک تہائی میں وصیت نافذ کی جائے گی۔ اگر کسی نے ایک تہائی سے زیادہ  کی وصیت کی ہو یا کسی وارث  کے حق میں وصیت کی ہو، چاہے ایک تہائی کی وصیت کی ہو یا اس سے کم وزیادہ کی تو  غیر وارث کے حق میں ایک تہائی سے زائد اور وارث کے حق مطلقاً  یہ وصیت نافذ نہ ہوگی، البتہ اگر ورثا میں کوئی نابالغ نہ ہو اور سب ورثا بغیر کسی جبر واکراہ اور بلا کسی قسم کے دباؤ اور مجبوری کے اس قسم کی وصیت کے نافذ کرنے پر راضی ہوں تو اسے نافذ قرار دیا جائے گا، لیکن اگر ورثا میں کوئی نابالغ ہویا بالغ ہوں، لیکن راضی نہ ہوں تو غیر وارث کے حق میں ایک تہائی سے زائد کی وصیت یا کسی وارث کے حق میں کی گئی وصیت مطلقاً  نافذ نہ ہوگی۔(4) ان تین حقوق کی ادائیگی کے بعد میت کے ترکہ میں سے جو  مال بچ جائے تو اس کو ورثا کے مابین میراث کے شرعی ضابطے کے مطابق تقسیم کیا جائے گا۔

                لہذا صورتِ مسئولہ میں(1) اگر مرحومہ کی وفات کے وقت واقعی اس کے والدین اور بہن، بھائیوں میں سے کوئی موجود نہ  تھا، بلکہ صرف بھتیجے ،بھتیجی اور بھانجے اور بھانجیاں موجود تھیں تو صرف بھتیجے اس کے وارث ہوں گے۔

                جہاں تک  لاپتہ بھتیجے کا حکم ہے تو شرعاً لاپتہ شخص اس کو کہا جاتا ہے جو اپنے علاقے  سے اس طور پر غائب ہو کہ اس کی موت وحیات کا کوئی علم نہ ہو۔ محض عرصہ دراز سے اپنے شہر نہ آنے کی وجہ سےکوئی مفقود(لاپتہ) شمار نہیں ہوتا، لہذا اگر مرحومہ کا ایک  بھتیجااس طور پر غائب ہو کہ اس  کی موت وحیات کا  کوئی علم نہ ہوتو مرحومہ کے ترکہ میں سے  اس کو بھی  حصہ دیا جائے گا اور اس کے حصہ کو کسی معتمد شخص کے پاس رکھا جائے گا اگر وہ زندہ آگیا تو اس کو اپنا حصہ دے دیاجائےگااور اگر اس کی موت کا علم ہوجائے یا اتنی مدت گزرجائے کہ اس کی عمر نوے سال ہوجائے اور مسلمان  حاکم  یا قاضی کی طرف سے اس کی موت  کا  فیصلہ ہوجائے تو اس کے بعد اس کے موقوف  مال کو  مرحومہ کے دیگر بھتیجوں کے مابین ان کے حصص کے مطابق تقسیم کیا جائے گا۔

2-ترکہ میں سے پہلے مرحومہ کے ذمہ واجب الادا قرض کو ادا کیا جائے گا، چاہے وہ بینک میں موجود رقم سے کیا جائےیا جائیداد کی قیمت سے،اس  کے بعد باقی ماندہ مال  وجائیدادکے ایک تہائی میں وصیت نافذ ہوگی، لہذا  سائلہ(بھانجی)اور دیگر تین رشتہ دار(دوسری بھانجی، بھانجے کا بیٹا اور بھتیجی کی بیٹی)جن کے حق میں وصیت کی گئی ہے  چونکہ یہ  ورثا نہیں ، اس لیے  مرحومہ کے قرض کی ادائیگی کے بعد  اِن کے حق میں باقی مال کے ایک تہائی میں وصیت نافذ ہوگی، جس کا طریقہ کار یہ ہوگا کہ اس ایک تہائی کو تین حصوں میں تقسیم کر کے ایک حصہ سائلہ کو  دیا جائے گا جس کے حق میں تہائی کی وصیت کی ہے جب کہ باقی دو حصےان تین افراد کو دیے جائیں گے جن کے حق میں وصیت کی ہےاور بقیہ مال ورثا میں تقسیم ہوگا۔تاہم اگر ورثا  میں کوئی نابالغ نہ ہو اور سب بغیر کسی جبر وکراہ اور کسی  قسم کے دباؤ کے اس پوری وصیت کے نافذ کرنے پر راضی ہوں تو بقیہ پورے مال میں وصیت نافذ کرنا جائز ہے۔

 قال علماؤنا ـ رحمهم الله ـ تتعلق بتركة الميت حقوق أربعة مرتبة: الأولى: يبدأ بتكفينه وتجهيزه من غير تبذير ولا تقتير، ثم تقضى ديونه من جميع ما بقي من ماله، ثم تنفذ وصاياه من ثلث مابقي بعد الدين، ثم يقسم الباقي بين ورثته بالكتاب والسنة وإجماع الأمة۔(السراجي، الحقوق المتعقة بتركة الميت: 5)

المفقود هو الرجل الذي يخرج في وجه فيفقد ولا يعرف موضعه ولا تستبين حياته ولا موته أو يأسره العدو فلا يستبين موته ولا قتله كذا في المحيط۔ قال مشايخنا رحمهم الله تعالى مدار مسألة المفقود على حرف واحد إن المفقود يعتبر حيا في ماله ميتا في مال غيره۔۔۔ حتى ينقضي من المدة ما يعلم أنه لا يعيش إلى مثل تلك المدة أو تموت أقرانه وبعد ذلك يعتبر ميتا في ماله يوم تمت المدة أو مات الأقران وفي مال الغير يعتبر ميتا كأنه مات يوم فقد كذا في الذخيرة من مات في حال فقده ممن يرثه المفقود يوقف نصيب المفقود إلى أن يتبين حاله لاحتمال بقائه فإذا مضت المدة التي تقدم ذكرها وحكمنا بموته قسمت أمواله بين الموجودين من ورثته وأما الموقوف من تركة غيره فإنه يرد على ورثة ذلك الغير ويقسم بينهم كأن المفقود لم يكن۔(الفتاوى الهندية، كتاب الفرائض، الباب الثامن في المفقود والأسير والغرقى والحرقى، ج:6، ص:448)

قال ولا تجوز بما زاد على الثلث۔۔۔ قال إلا أن يجيزه الورثة بعد موته وهم كبار؛ لأن الامتناع لحقهم وهم أسقطوه ۔۔۔ ولا تجوز لوارثه لقوله عليه الصلاة والسلام إن الله تعالى أعطى كل ذي حق حقه ألا لا وصية لوارث۔۔۔ قال إلا أن تجيزها الورثة۔(الهداية، كتاب الوصايا، باب الصفة الوصية، ج:4، ص:638-640)

كما إذا أوصى له بألف درهم وللآخر بألفين وثلث ماله ألف درهم فإن الثلث يكون بينهما أثلاثا كل واحد منهما يضرب بجميع نصيبه۔(الفتاوى الهندية، كتاب الوصايا، الباب الثلاث في الوصية بثلث المال ونحوه، ج:6، ص:115)