واضح رہے کہ سونا اور چاندی خلقی طور پر ثمن ہیں جبکہ  کرنسی موجودہ دور میں ثمن عرفی کی  حیثیت رکھتی ہے،یعنی حکومت کے بطور کرنسی جاری کرنے اور اعتبار دینے سے ثمن بن گئی ہے اور اسی وجہ  سے لوگوں میں بطورثمن متعارف ہے تا ہم چونکہ دونوں کی ثمنیت کی حیثیت مختلف ہے اس لیے کرنسی اور سونا چاندی کا باہم تبادلہ بیع صرف کے حکم میں داخل نہیں لہذا مجلس عقد میں دونوں طرف سے قبضہ شر ط نہیں  البتہ دونوں  میں سے ایک پر مجلس عقد میں  قبضہ ضروری ہے تا کہ ادھار کے بدلے ادھار کی بیع لازم نہ آئے کیونکہ حضور ﷐نے اس سے منع فرمایاہے۔

            صورت مسئولہ  میں کرنسی اور خالص سونے کے باہم تبادلہ کی صورت  میں اگر طرفین کسی بھی چیز پر قبضہ نہ کریں یعنی کرنسی اور سونا دونوں ادھارہو ں تو یہ ادھار کے بدلے ادھار کا سودا ہونے کی وجہ سے جائز نہیں۔

عن عبد الله بن دينار، عن ابن عمر، أن النبي صلى الله عليه وسلم نهى عن بيع الكالئ بالكالئ يعني: الدين بالدين. (شرح معاني الآثار،باب بيع المصراة،ج2،ص124)

وقيد بالذهب والفضة لأنه لو باع فضة بفلوس أو ذهب بفلوس فإنه يشترط قبض أحد البدلين قبل الافتراق لا قبضهما، كذا في الذخيرة۔( البحرالرائق، كتاب الصرف ج6، ص324)