واضح رہے کہ مضارب کےلیے مضاربت کی رقم  میں صرف ان تصرفات کا اختیار ہوتا ہے جن کا تعلق مضاربت سے ہو یا اس کے توابع میں سے ہوں، جیسے: نقداً یا ادھار خرید و فروخت کرنا، یا کوئی چیز کرایہ پر دینا یا لینا ، یا مضاربت کا مال کسی کے پاس امانت رکھنا وغیرہ۔ اس کے علاوہ جن تصرفات کا تعلق مضاربت سے نہ ہو اور نہ ہی اس کے توابع میں سے ہوں ، جیسے: کسی کو ہبہ کرنا، یا صدقہ کرنا یا قرض دینا وغیرہ، تو کسی مضارب کےلیے مضاربت کی رقم میں رب المال (سرمایہ کار) کی اجازت کے بغیر اس قسم کے تصرفات کا اختیار نہیں ہوتا۔

            صورت مسئولہ کے مطابق چونکہ ایک انویسٹر کے پیسے دوسرے انویسٹر کی بیع میں دینا، ایک کی رقم دوسرے  کو قرض دینے کے حکم میں ہے، جس کا اختیار مضارب کے پاس نہیں ہوتا، اس لیے رب المال کی اجازت کے بغیر شرعاً یہ عمل جائز نہیں۔ تاہم اگر کوئی رب المال مضارب کو اپنی رقم کسی کو قرض دینے کی اجازت دے دے، تو اس صورت میں اس کی گنجائش ہے۔

الأصل أن ما يفعله المضارب ثلاثة أنواع نوع يملكه بمطلق المضاربة وهو ما يكون من باب المضاربة وتوابعها ومن جملته التوكيل بالبيع والشراء للحاجة والرهن والارتهان والإجارة والاستئجار والإيداع والإبضاع والمسافرة...ونوع لا يملكه لا بمطلق العقد ولا بقوله اعمل برأيك إلا أن ينص عليه رب المال وهو الاستدانة...والإقراض والهبة والصدقة هكذا في الهداية. (الفتاوى الهندية، كتاب المضاربة، الباب الرابع فيما يملك المضارب من التصرفات وما لا يملك، ج:4، ص:300)