کعبۃ اللہ دنیا کی سطح پر اللہ تعالی کے نزدیک افضل ترین  مقام ہے، جس کا احترام رکھنا اور ہر قسم کی بے ادبی سے بچنا مسلمانوں پر لازم ہے، اور کسی چیز کی جانب پیشاب کرنا چونکہ اس چیز کی بے ادبی شمار ہوتی ہے، یہی وجہ ہے کہ احادیث مبارکہ میں بیت اللہ کی جانب پیشاب کرنے سے ممانعت آئی ہے، چنانچہ رسول اللہ ﷺ کے ارشاد مبارک کا مفہوم ہے: جب تم بیت الخلا آؤ تو چھوٹے اور بڑے استنجا میں قبلہ کی طرف نہ منہ کرو اور نہ پیٹھ۔ اسی طرح ابو ایوب انصاری رضی اللہ عنہ فرماتے ہیں کہ جب ہم شام گئے تو وہاں پر بیت الخلا قبلہ کی جانب بنے ہوئے تھے، تو ہم تکلف کے ساتھ گھوم کر بیٹھتے تھے، یعنی حتی الامکان قبلہ کی جانب منہ یا پیٹھ کرنے سے بچنے کی کوشش کرتے، اور استغفار کرتے۔

            لہٰذا صورت مسئولہ کے مطابق اپارٹمنٹ میں قبلہ کی جانب کموڈ  بنانا لوگوں کو بیت اللہ کی بے ادبی اور بے حرمتی پر مجبور کرنے کا مترادف ہے، جو شرعا ناجائز ہے، اس لیے اپارٹمنٹ کا نقشہ تبدیل کرکے کموڈ کو قبلہ کی جانب سے پھیر کر اس طرح لگایا جائے کہ نہ قبلہ کی طرف منہ آئے اور نہ پشت۔

عن أبي أيوب الأنصاري قال : قال رسول الله صلى الله عليه و سلم إذا أتيتم الغائط فلا تستقبلوا القبلة بغائط و لا بول و لا تستدبروها و لكن شرقوا أو غربوا فقال أبو أيوب فقدمنا الشأم فوجدنا مراحيض قد بنيت مستقبل القبلة فننحرف عنها ونستغفر الله. (سنن الترمذي، ابواب الطهارة، باب في النهي عن استقبال القبلة بغائط أو بول، رقم الحديث:8، ج:1،ص:13)