شریعت مطہرہ کی رو سے ہر شخص کو اپنی زندگی میں اپنے مال وجائیداد میں ہر قسم کے جائز تصرفات کا حق حاصل ہے، لہذا اگر كوئی شخص زندگی میں کسی کو کوئی مال یا جائیداد   ملکیتا دیدے اور وہ اس پر قبضہ کرے تویہ اس شخص  کی طرف سے ہبہ شمار ہوگا اور اس کے موت کے بعد اس کے ورثا اس میں حقدار نہ ہوں گے ،لیکن اگر اس شخص کی زندگی میں موہوب لہ (جس کو ہبہ دیا گیا ہو )نے قبضہ نہ کیا تو پھر یہ اس کی ملکیت متصور نہ ہوگی بلکہ تمام ورثا اس میں شریک ہوں گے۔

                 صورت مسٔولہ کے مطابق اگر مذکورہ شخص نے اپنا گھر اپنی بیوی کے نام کردیا تھا اور بیوی نے اس پر شوہر کی  زندگی میں قبضہ بھی کرلیا تھا تو پھر بیوی ہی اس کی مالکہ ہونے کی بنا پر باقی ورثا کا اس میں حصہ نہ ہوگا۔اس کے بعد بیوہ نے اگر واقعی یہ گھر اپنے چھوٹے بیٹے کے نام کر دیا تھاتو اگر بیٹے نے ماں کی زندگی ہی میں اس پر قبضہ کر لیا تھا   تو ایسی صورت میں  یہ گھر صرف اسی بیٹے  کی ملکیت شمار ہوگی ۔لہذا ماں کی  وفات کے بعد باقی ورثا میں تقسیم نہ ہوگی،لیکن اگر بیٹے کو قبضہ نہیں دیا تھا تو محض زبانی طور پر اس کے نام کرنے سے یہ اس کی ملکیت نہ ہوگی بلکہ تمام ورثا اس میں شریک ہوں گے۔

وركنها هو الإيجاب والقبول وتتم الهبة بالقبض(الدر المختارعلى صدررد المحتار،كتاب الهبة، ج:8، ص:490)