نماز جمعہ کے وجوب کے لیے دیگر شرائط کے علاوہ علاقے کا مصر، فنائے مصر ، قریہ کبیرہ اور یا اس كے مضافات کا ہونا ضروری ہے، فنائے مصر یا مضافات قریہ کبیرہ کے بارے میں عرف کو مدار بنایا جائے گا ، لہذا شہر کے لوگ جن لوگوں کے ساتھ غمی خوشی میں شریک ہوں اور اس جگہ کے لوگ اپنی ضروریات اسی شہر یا قریہ کبیرہ سے پورے کرتے ہوں اور ان کی نسبت اسی شہر یا قریہ کبیرہ کی طرف ہوتی ہو تو یہ لوگ اسی شہر کے مضافاتی کہلائیں گےاگر چہ ان کے درمیان زرعی يا خالی زمین واقع ہو اور جو علاقے عرف میں شہر یا قریہ کبیرہ کے مضافات  كی بجائے مستقل بستیاں یا گاؤں شمار ہوتے ہوں اور ان میں شرائط جمعہ موجود نہ ہوں تو وہاں جمعہ پڑھنا جائز نہ ہوگا۔

           صورت مسٔولہ میں اگر مذکورہ قریہ کبیرہ کے اطراف کی آبادی عرف میں اسی  کے مضافات شمار ہوتے ہوں اور اطراف والے لوگ اپنی ضرورت اسی قریہ کبیرہ سے پورے کرتے ہوں تو پھر یہ اطراف قریہ کبیرہ کے مضافات اور توابع  کے حکم میں ہوں گے اور ان لوگوں کے لئے  وہاں نماز جمعہ شروع کرنا صحیح ہوگا ، لیکن اگریہ اطراف عرف میں قریہ کبیرہ کے مضافات شمار نہ ہوتے ہو بلکہ یہ الگ بستیاں یا گاؤں  شمارکیے جاتے ہوں تو  پھر ان کے لیے نماز جمعہ پڑھنا اور شروع کرنا جائز نہ ہوگا ۔

لا تجب الجمعة إلا على أهل المصر ومن كان ساكنا في توابعه وكذا لا يصح أداء الجمعة إلا في المصر وتوابعه فلا تجب على أهل القرى التي ليست من توابع المصر ولا يصح أداء الجمعة فيها۔ ( بدائع الصنائع، كتاب الصلاة، فصل في بيان شرائط الجمعة، ج:1، ص:259)

وعبارة القهستاني تقع فرضا في القصبات والقرى الكبيرة التي فيها أسواق۔ (رد المحتار، كتاب الصلاة،باب الجمعة،ج:2، ص:138)

ومن كان مقيما بموضع بينه وبين المصر فرجة من المزارع والمراعي نحو القلع ببخارى لا جمعة على أهل ذلك الموضع وإن كان النداء يبلغهم والغلوة والميل والأميال ليس بشيء هكذا في الخلاصة. (الفتاوى الهندية، كتاب الصلاة، الباب السادس عشر في صلاة الجمعة، ج:1، ص:145)