واضح رہے کہ لفظِ "آزاد "بذاتِ خود اگر چہ کنائی ہے، جس سے طلاق کا وقوع نیت پر مبنی ہے، تاہم عرف میں یہ لفظ طلاق ہی کے لیے استعمال ہوتا ہے ، اس لیے فقہائے کرامؒ نے اس کو طلاقِ صریحی میں شمار کرکے بغیر نیت کے بھی اس سے وقوعِ طلاق کا قول کیا ہے۔

             لہذا صورتِ مسئولہ کے مطابق کسی شخص کا اپنی بیوی سے  تین دفعہ" تم آزاد ہو"کہنے سے تین طلاقیں واقع ہوگئیں اور عورت اس پر مطلقہ مغلظہ ہے اور وہ شخص اس سے دوبارہ رجوع یا تجدیدِ نکاح کا حق نہیں رکھتا، تاہم اگر یہ عورت عدت گزار کر کسی دوسرے شخص سے نکاح کرے اور وہ دوسرا شخص  جماع کرنے کے بعد اس کو طلاق دے یا اس کا انتقال ہوجائے تو عورت عدت گزارنے کے بعد پہلے شوہر سے نکاح کرسکتی ہے۔

عَنْ عَائِشَةَ: أَنَّ رَجُلًا طَلَّقَ امْرَأَتَهُ ثَلَاثًا فَتَزَوَّجَتْ زَوْجًا فَطَلَّقَهَا قَبْلَ أَنْ يَمَسَّهَا، فَسُئِلَ رَسُولُ اللَّهِ صَلَّى اللهُ عَلَيْهِ وَسَلَّمَ، أَتَحِلُّ لِلْأَوَّلِ؟ فَقَالَ: «لَا، حَتَّى يَذُوقَ عُسَيْلَتَهَا كَمَا ذَاقَ الْأَوَّلُ»۔(سنن النسائي ، كتاب الطلاق ، باب المطلقة ثلاثا ، ج: 2 ص: 84)

فإن سرحتك كناية لكنه في عرف الفرس غلب استعماله في الصريح فإذا قال " رهاكردم " أي سرحتك يقع به الرجعي مع أن أصله كناية أيضا، وما ذاك إلا لأنه غلب في عرف الفرس استعماله في الطلاق۔(ردالمحتار على الدرالمختار ، كتاب الطلاق ، باب الكنايات ، ج: 4 ص: 530)