نماز کی صحت کی شرائط میں سے ایک شرط طہارت ہے کہ نمازی کا بدن، کپڑے اور جگہ پاک ہو، چنانچہ جہاں کہیں یہ شرط مفقود ہو تو نماز درست نہ ہوگی، اسی طرح اگر نمازی کے اپنے کپڑے پاک ہوں لیکن دوران نماز وہ کسی ایسے بچے کو ایک رکن(تین مرتبہ سبحان اللہ کہنے کے بقدر) تک گود میں اٹھائے رکھےجس کے کپڑے یا بدن نجس ہو تو اس صورت میں بھی نماز درست نہ ہوگی۔

            لہٰذا صورت مسئولہ میں اگر عورت کو معلوم ہو کہ بچے نے پیمپر میں پیشاب کیا ہے تو نماز سے پہلے نجاست کو دور کر کے بچے کو پاک کرنا ضروری ہوگا، ورنہ اسی طرح نجس حالت میں بچے کو گود میں لے کر نماز پڑھنا درست نہ ہوگا۔

            اسی طرح اگر طواف کے دوران عورت کو معلوم ہوجائےکہ بچے نے پیمپر میں پیشاب کیا ہےتو طواف کو موقوف کر کے پہلے نجاست کو دور کرے پھر طواف کو مکمل کرے، تاہم اگر کسی نے اسی حالت میں طواف کو مکمل کیا تو شرعا یہ طواف ہوجائے گا مگر مکروہ ہوگا، کیوں کہ نجاست کے ساتھ طواف کرنا مکروہ ہے۔

إذا وضع في حجر المصلي الصبي الغير المستمسك وعليه نجاسة مانعة إن لم يمكث قدر ما أمكنه أداء ركن لا تفسد صلاته وإن مكث تفسد بخلاف ما لو استمسك وإن طال مكثه. (الفتاوى الهندية، كتاب الصلوة، الباب الثالث، الفصل الثاني، ج:1، ص:120)

ولو طاف طواف الزيارة وفي ثوبه نجاسة أكثر من قدر الدرهم أجزأه ولكن مع الكراهة ولا يلزمه شيء كذا في المحيط. (الفتاوى الهندية، كتاب المناسك، الباب الثامن، الفصل الخامس، ج:1، ص:310)