جو شخص کسی خاص فرد یا ادارے کا ملازم نہ ہو بلکہ بیک وقت مختلف لوگوں کی خدمت کر تا ہو، مثلاً: درزی وغیرہ ، تو وہ اجیر مشترک کہلاتا ہے،جس کا حکم یہ ہے کہ اگر عقد کے وقت عاقدین نے یہ شرط نہ لگائی ہو کہ اجیربذاتِ خود یہ کام سرانجام دےگابلکہ مطلقا عقد ہوا ہو تو چاہے وہ خود وہ  کام سرانجام دے یا کسی اور سے کروائے، دونوں صورتوں میں وہ اجرت کا مستحق ہو تاہے۔

1. لہٰذا صورت مسئولہ میں جو شخص لوگوں سے CV وغیرہ بنانے کا آرڈر  دوسو روپے میں وصول کرتاہے تو یہ اجیر مشترک ہے، پھر اگر یہ دوسرے شخص سے سو روپے میں بنواتا ہو تو اگر آرڈر دینے والے نے عقد کے وقت یہ شرط نہ لگائی ہو کہ تم خود ہی بناؤگے تو خواہ وہ خود بنائےیا کسی اور سے بنوائے ، چاہے اسی اجرت پر بنوائے جس پر اس کا معاملہ گاہک کے ساتھ ہوا ہے یا اس سے کم یا زیادہ اجرت پر بنوائے،  بہر صورت اس کا یہ معاملہ شرعاً درست ہے اور اس کی اجرت بھی جائز ہے۔
2. سائل کی بیان کردہ صورت کے مطابق دوسرا شخص لوگوں اور CV بنانے والے کے درمیان دلال (واسطہ)  نہیں ہے بلکہ بذات خود اجیر مشترک کے حکم میں ہے۔

 وبعضهم قالوا الأجير المشترك من يتقبل العمل من غير واحد والأجير الخاص من يتقبل العمل من واحد. (الفتاوى الهندية، كتاب الإجارة، الباب الثامن والعشرون، ج:4، ص:455)