واضح رہے کہ خرید و فروخت  کے  معاملہ میں بائع اور مشتری   کے  درمیان واسطہ بننے والے کو اصطلاح فقہ میں سمسار یا دلال کہتے ہیں۔ضرورت  اور کثرت   تعامل کی وجہ سے فقہا ئےکرام نے دلال کے لیے  کمیشن لینے کو جائز قرار دیا ہے ،بشرطیکہ  کمیشن کی اجرت متعین ہو اور عقد بائع اور مشتری خود کرے اور دلال ان کے مابین صرف واسطہ ہو۔

          صورت مسئولہ میں اگر سائل سپلائی کمپنی اور گاڑیوں کے مالکان کے درمیان صرف بطور واسطہ کے کام کرتا ہو،یعنی سپلائی کمپنی والے اس سے متعین کمیشن پر گاڑیوں کے مہیا کرنے کا مطالبہ کرتے ہوں اور پھر  عقد اجارہ گاڑیوں کے مالکان کے ساتھ خود کرتے ہوں تو اس صورت میں سائل کے لیے کرایہ پر گاڑیوں کے مہیا کرنے پر متعین کمیشن لینا جائز ہے ،کیونکہ اس صورت میں وہ ان کے مابین واسطہ ہے اور اس کی حیثیت ایک دلال کی ہے اور اگر  سائل ان دونوں کے درمیان بطور واسطہ کے کام نہ کرے ۔بلکہ دونوں کے ساتھ الگ الگ عقد کرے تو اس صورت  میں وہ د لال نہیں  ،بلکہ عاقد ہوگا۔چنانچہ سائل کا کمپنی والوں کے ساتھ سامان لے جانے کا عقد کرکے فی گاڑی کا کرایہ ایک لاکھ پچاس ہزار روپے مقرر کرنا اور پھر اس سامان کو لے جانے کے لیے گاڑیوں کے مالکان کے ساتھ ایک لاکھ روپے کرایہ پر عقد اجارہ کرنا  جائز ہے ،اس لیے کہ اس نے سامان لے جانے کی ذمہ داری قبول کی ہے  اب چاہے وہ اپنی گاڑیوں کے ذریعے لے جائے یا دوسروں کے ذریعے  دونوں صورتیں جائز ہیں ۔

جہاں تک سائل کا  منیجر کے لیے اس کے مطالبہ پر بل میں رقم بڑھانا  ہے تو سائل کے لیے ایسا کرنا جائز نہیں ،کیونکہ منیجر کا  اس طرح دھوکہ دہی کے ساتھ اضافی رقم لینا نا جائز ہےاورسائل کا اس دھوکہ دہی اور حرام کام میں منیجر کا ساتھ دینا گناہ  ہے۔

قال اللہ تعالی:﴿وَلَا تَعَاوَنُوا عَلَى الْإِثْمِ وَالْعُدْوَانِ﴾(سورۃالمائدۃ:2)

وفي الحاوي: سئل محمد بن سلمة عن أجرة السمسار، فقال: أرجو أنه لا بأس به وإن كان في الأصل فاسدا لكثرة التعامل وكثير من هذا غير جائز، فجوزوه لحاجة الناس إليه كدخول الحمام۔(ردالمحتار علی الدرالمختار،کتاب الإجارۃ،باب ضمان الأجیر،ج:9،ص:87)

"وإن أطلق له العمل فله أن يستأجر من يعمله"؛ لأن المستحق عمل في ذمته، ويمكن إيفاؤه بنفسه وبالاستعانة بغيره بمنزلة إيفاء الدين.(الھدایۃ،کتاب الإجارات،باب الأجر متی یستحق،ج:6،ص:233)