شریعتِ مطہرہ کی رو سے اس بات کی اجازت ہے کہ کسی ایک شخص یا ادارے کی ملکیتی زمین کو دوسرا شخص بطورِ عاریت یعنی بلا عوض منافع حاصل کرکے  یا اجارہ یعنی اجرت کے عوض منافع حاصل کرکے اس پر عمارت تعمیر کرے اور پھر ایک مخصوص عرصے تک اس کو خود استعمال کرے یا اس کو کرایہ پر دے کر اس کے عوض ملنے والی رقم کو اپنے استعمال میں لائے ۔ نیز ایسی صورت میں  مقررہ مدت ختم ہونے کے بعد زمین کا مالک اور عمارت کا مالک دونوں اگر باہم رضامندی سے دوسرے دورانیہ کے لیے اپنے اس معاہدے  کو بڑھانا چاہیں تو اس کی بھی گنجائش ہے اور اگر دونوں یا دونوں میں سے ایک اس معاہدہ کو ختم کرنا چاہے تو ایسی صورت میں دو طریقے ممکن ہیں :

1. عمارت کا مالک اپنی عمارت ہٹاکر زمین خالی کردے ۔
2. طرفین کی رضامندی سے عمارت کی قیمت مقرر ہوجائے اور زمین کا مالک عمارت کو خرید کر اس کی قیمت دوسرے فریق کو حوالہ کردے ۔

اس تمہید کے بعد  سوال کا جواب یہ ہے کہ الف(ادارہ) کی ملکیت میں جو زمین ہے اور وہ اس پر دوسرے سرمایہ کار کے ذریعے عمارت بنواکر خود اس سے مستفید ہونا چاہتا ہے تو یہ دونوں  فریق اپنے مقاصد کے حصول کے لیے شرعاً درج ذیل طریقہ کار کے مطابق معاہدہ کرسکتے ہیں :

(1)الف (ادارہ) جو زمین کامالک  ہے وہ زمین کی ملکیت کو اپنے پاس رکھتے ہوئے، ب(سرمایہ کار) کو اس پر مخصوص مدت (مثلاً دس سال یا کم وبیش ) کے لیے عمارت بنانے کی اجازت دے دے۔

( 2) ب (سرمایہ کار) خود یا اس کا نمائندہ (جو خود الف بھی ہوسکتا ہے)  اس زمین پر عمارت تعمیر کرے۔

(3)مکمل عمارت یا اس کا ایک حصہ جب تعمیر ہو کر قابلِ استعمال ہوجائے تو ب (سرمایہ کار) الف (ادارہ) کو وہ عمارت کرایہ پر دے دے اور طرفین باہم رضامندی سے اجارے کا معاملہ طے کریں۔

(4)الف (ادارہ) کرایہ پر حاصل شدہ عمارت کو اپنے مقاصد کے لیے استعمال کرکے حسبِ معاہدہ اس کا کرایہ ادا کرتا رہے۔

(5)جب تک ب(سرمایہ کار) اس عمارت کا مالک ہے اس وقت تک اس عمارت کا ضامن بھی وہ ہوگا ، یعنی اگر خدانخواستہ کسی حادثہ وغیرہ سے عمارت کو نقصان پہنچے تو ب(سرمایہ کار) ہی اس نقصان کا بار اٹھائے گا ، چنانچہ اس کی مرمت یا تعمیرِ نو کا خرچہ بھی ب(سرمایہ کار) پر آئے گا۔ تاہم عرف کے مطابق معمولی نوعیت کی جو مرمت کرایہ دار پر لازم ہوتی ہے، اس کے اخراجات الف (ادارہ) برداشت کرے گا۔

(6)معاہدہ کے مطابق مدت ختم ہونے کے بعد طرفین کی رضامندی سے از سرِ نو نئی مدت کے لیے اجارہ کیا جاسکتا ہے۔

(7)عمارت کی ملکیت ب (سرمایہ کار) سے الف (ادارہ )کی طرف منتقل ہونے کی دو صورتیں ہیں اور دونوں شرعاً جائز ہیں۔

پہلی صورت:عمارت کی تعمیر کے بعد اس کے یونٹ بنادیے جائیں اور ہر یونٹ کی قیمت مقرر کرلی جائے، مثلاً عمارت پانچ کروڑ میں مکمل ہوئی،تو اس کے 500 یونٹ بناکر فی یونٹ کی قیمت ایک لاکھ مقرر کردی جائے اور ب (سرمایہ کار)کی طرف سے الف (ادارہ) کو یہ پیش کش ہو کہ وہ جب جتنے یونٹ خریدنا چاہتا ہے تو خرید سکتا ہے ۔چنانچہ اس کے بعد الف (ادارہ) اپنی وسعت کے مطابق جب جتنے یونٹ خریدے گا اتنے یونٹ کا وہ مالک بنتا جائے گا اور اسی تناسب سے عمارت کے کرایہ میں بھی کمی آتی رہے گی ۔ مثلاً اگر کل کرایہ پانچ لاکھ روپے طے ہوا ہے اور ادارہ نے پانچ یونٹ ( یعنی کل کا ایک فیصد) خریدا ہے تو اگلے مہینے کے کرایہ میں ایک فیصد کرایہ (پانچ ہزار) کی کمی ہوجائے گی۔

دوسری صورت: یہ ہے کہ مقررہ مدت کے دوران وقتاً فوقتاً حصص خریدنے کی بجائے مقررہ مدت کے آخر میں طرفین کی رضامندی سے یا مارکیٹ ریٹ کے مطابق عمارت کی قیمت لگائی جائے اور  الف (ادارہ) وہ قیمت ب کو ادا کرکے عمارت کی ملکیت حاصل کرلے۔

(و) تصح إجارة أرض (للبناء والغرس) وسائر الانتفاعات كطبخ آجر وخزف ومقيلا ومراحا حتى تلزم الأجرة بالتسليم أمكن زراعتها أم لا بحر (فإن مضت المدة قلعهما وسلمها فارغة) لعدم نهايتهما (إلا أن يغرم له المؤجر قيمته) أي البناء والغرس (مقلوعا) بأن تقوم الأرض بهما وبدونهما فيضمن ما بينهما اختيار (ويتملكه) بالنصب عطفا على " يغرم "؛ لأن فيه نظرا لهما.قال في البحر: وهذا الاستثناء من لزوم القلع على المستأجر، فأفاد أنه لا يلزمه القلع لو رضي المؤجر بدفع القيمة لكن إن كانت تنقص بتملكها جبرا على المستأجر وإلا فبرضاه (أو يرضى) المؤجر عطفا على " يغرم " (بتركه) أي البناء والغرس (فيكون البناء والغرس لهذا والأرض لهذا) وهذا الترك إن بأجر فإجارة وإلا فإعارة، فلهما أن يؤاجراهما لثالث ويقتسما الأجر على قيمة الأرض بلا بناء وعلى قيمة البناء بلا أرض، فيأخذ كل حصته۔(الدرالمختار ، كتاب الإجارة ، ج: 9 ص: 41)

وفي جامع الفصولين أيضا: لو ذكرا البيع بلا شرط ثم ذكرا الشرط على وجه العقد جاز البيع ولزم الوفاء بالوعد، إذ المواعيد قد تكون لازمة فيجعل لازما لحاجة الناس۔(ردالمحتار ، مطلب في البيع بشرط فاسد ، ج: 7 ص: 281)

للمالك أن يوجر ماله ملكه لغيره مدة معلومة قصيرة كانت كيوم أو طويلة كسنين أو أكثر حتى لو آجرها إلي مدة لايعيش العاقدان إلى مثلها عادة جاز واختاره الخصاف ومنعه بعضهم وظاهر إطلاق المتون ترجيح الأول۔(شرح المجله لسليم رستم باز ، الكتاب الثاني في الإجارة ، المادة: 484 ص: 271)

ويجوز تجديد الإجارة لمدة أخرى بعدها سواء حصل التجديد قبل إنتهاء المدة الأصلية أم تلقائيّا بوضع نص في العقد بالتجديد عند دخول فترة جديدة إذا لم يتم الإشعار برغبة أحد الطرفين في عدم التجديد۔(المعايير الشرعية ، المعيار الشرعي رقم: 9 الإجارة والإجارة المنتهيه بالتمليك ، ص: 253