واضح رہے کہ کسی عورت کے لیے محرم کے بغیر مسافت شرعی کی مقدار میں سفر کرنا ناجائز ہے، کیونکہ حضورﷺ نے فرمایا ہے  کہ "کوئی عورت تین دن کا سفر محرم کے بغیر نہ کرے" البتہ اگر کوئی عورت  مقدار سفر محرم کے ساتھ طے کرکے کم از کم ایک مرتبہ  پندرہ  دن  اقامت کی نیت سے کسی ایسی جگہ میں ٹھہرے جہاں اس کی عزت وآبرو پوری طرح محفوظ ہو تو وہاں پر اقامت کی صورت میں اس کے ساتھ محرم کا ہونا ضروری نہیں ۔

صورت مسٔولہ میں اگر کوئی عورت گھر سے محرم کے ساتھ نکل کر شرعی مسافت طے کر کےکسی ایسے ہاسٹل یا مدرسہ میں اقامت اختیار کرے ، جہاں شرعی اصولوں کی مکمل رعایت موجود ہو۔ بے حیائی ، بےپردگی اور غیر اخلاقی ماحول کا خدشہ نہ ہو ، اور عورت کی عفت  وعصمت اور پاکدامنی کا لحاظ پوری طرح ممکن ہو تو ایسے ہاسٹل یا مدرسہ میں عورت کے لیے اقامت اختیار کرنے کی گنجائش ہے، کیونکہ حدیث کی رو سے محرم کا سفر میں ہونا شرط ہے ،اقامت میں نہیں۔

" عن ابن عمر رضي الله عنهما: أن النبي صلى الله عليه وسلم قال:لا تسافر المرأة ثلاثة أيام إلا مع ذي محرم"(صحيح البخاري، باب: في كم يقصر الصلاة، حديث:1086)

" ولا يزال على حكم السفر حتى ينوي الإقامة في بلدة أو قرية خمسة عشر يوما أو أكثر، كذا في الهداية"( الفتاوى الهندية،كتاب الصلوة،الباب الخامس العشر في صلاة المسافر،ج:1،ص:199)