شریعتِ مطہرہ کی  رو سے ہر شخص کو اپنے مال و جائیداد میں ہر قسم کے جائز تصرف کا حق حاصل ہے، چنانچہ اگر کوئی شخص زندگی میں بحالتِ صحت اور بقائے ہوش وحواس اپنا مملوکہ مال و جائیداد کسی کو ہبہ کر کے قبضہ دے تو موہوب لہ کا اس موہوبہ چیز پر قبضہ کرنے سے ہبہ تام ہوجاتا  ہےاور وہ چیز موہوب لہ کی ملکیت شمار ہوگی اور واہب کی وفات کے بعد اس موہوبہ چیز میں میراث جاری نہ ہوگی۔

            صورتِ  مسئولہ میں اگر واقعی مسماۃ بی بی الہامیہ نے بحالتِ صحت اور بقائے ہوش وحواس  زندگی میں اپنی مملوکہ جائیداد اپنی بیٹی(مسماۃبی بی حقانیہ) کوہبہ کر کے قبضہ بھی دیا ہو تو ہبہ تام ہونے کی وجہ سے مذکورہ  جائیداد بی بی حقانیہ کی ملکیت شمار ہوگی اور کسی اور کو  اس میں ملکیت کا دعوی  کرنے کا حق حاصل نہیں،کیونکہ دیگر ورثا مرحومہ کی جائیداد میں اس وقت دعوی کرسکتے ہیں اگر مرتے وقت مرحومہ کی ملکیت ہو۔جب مرتے وقت مرحومہ کی ملکیت میں کوئی جائیداد غیر منقولہ نہ تھی بلکہ اس نے زندگی میں بیٹی کے نام انتقال کرکے قبضہ دیا تھا تو پھر ورثا کے لیے کوئی ترکہ باقی نہیں رہتا جس کا وہ دعوی کریں۔

وتنعقد الهبة بالإيجاب والقبول وتتم بالقبض الكامل؛ لأنها من التبرعات، والتبرع لايتم إلا بالقبض۔(شرح المجلة لسليم رستم باز، مادة:737، ص:462)