واضح رہے کہ اپنے والد کو چھوڑ کر کسی اور کی طرف اپنی نسبت اس طور پر کرنا کہ دوسرا شخص اس کا والد سمجھا جائے،یا اپنے والد کی نفی کر کے دوسرے شخص کو والد کہنا شرعا ممنوع ہے۔ احادیث مبارکہ میں اس عمل کو جنت حرام ہونے کا سبب قرار دیا گیا ہے ۔ نیز امامت ایک عظیم منصب ہے جس کا مستحق وہ شخص ہے جو متقی، پرہیزگار، اور احکام شرعیہ کا پابند ہو ، اور کسی حکم شرعی کے خلاف عمل پر جہرا اصرار نہ کرتا ہو۔

            لہذا صورت مسئولہ کے مطابق کسی شخص کا شناختی کارڈ میں اپنے والد کی بجائے چچا کا نام لکھوانا ا گر اپنے والد سے نسبت کی نفی کر کے چچا کی طرف اپنی نسبت کرنے کے مقصد سے ہو، تو یہ عمل شرعا حرام ہے، جس کے مرتکب کو مستقل امام بنانا مکروہ ہے۔ تاہم اگر لوگوں کو اس کے والد کے بارے میں علم ہو اور وہ بھی اپنے والد سے نسبت کی نفی نہیں کر رہا ہو بلکہ اپنے والد کو والد اور چچا کو چچا کہتا ہو لیکن بچپن سے اس کے کاغذات اور شناختی کارڈ میں والد کی بجائے چچا کا نام لکھا گیا ہوجس کو ٹھیک کرنے میں مشکلات درپیش ہوں،  تو اس صورت میں اس کی امامت میں کوئی حرج نہیں۔

عن سعد رضي الله عنه، قال سمعت النبي صلى الله عليه وسلم، يقول: «من ادعى إلى غير أبيه، وهو يعلم أنه غير أبيه، فالجنة عليه حرام» (الصحیح للبخاری، کتاب الفرائض، باب من ادعی إلی غیر أبیه، حديث: 6766، ج: 4/ص: 1885).

ويكره إمامة العبد والأعرابي والأعمى والفاسق وولد الزنا والمبتدع. (الاختيارلتعليل المختار، كتاب الصلوة، فصل في صلوة الجماعة، ج: 1/ص: 158)