شرعی نقطہ نظر سے زکوۃ کی ادائیگی میں مستحقین زکوۃ کو مالک بنانا ضروری ہے،چنانچہ جہاں کہیں تملیک کی شرط مفقود ہوگی وہاں زکوۃ کی ادائیگی درست نہ ہوگی ، یہی وجہ ہے کہ مدرسہ یا دیگر رفاہی اداروں کی تعمیر میں زکوۃ یا دیگر صدقات واجبہ کی رقم بغیرتملیک کے خرچ کرنا جائز نہیں ۔البتہ اگر کسی مستحق زکوۃ کو اس کا مالک بنادیا جائے اور وہ برضا ورغبت پوری رقم یا اس رقم کا کچھ حصہ تعمیر میں خرچ کرے تو اس کی گنجائش ہے ۔

          صورت مسئولہ کے مطابق اگر کوئی شخص زکوۃ کی رقم مدرسہ کی تعمیر میں خرچ کرنا چاہے ، تو کسی غریب مستحق زکوۃ کو اس کا مالک بنادے اور اس کو یہ ترغیب دے کہ وہ اپنی رقم مدرسہ کی تعمیر میں دیدے ۔تاہم اس سلسلے میں اس مستحق کو اختیار ہوگا کہ وہ اپنی رضا ورغبت سے وہ رقم مدرسہ کی تعمیر میں دےیا نہ دے،اس پر کوئی جبر اور زبر دستی نہیں کی جائیگی۔

ولا يجوز أن يبني بالزكاة المسجد، وكذا القناطر والسقايات، وإصلاح الطرقات، وكري الأنهار والحج والجهاد وكل ما لا تمليك فيه۔(الفتاوى الهندية ، كتاب الزكوة ، الباب السابع في المصارف ، ج: 1 ص: 250)

وقدمنا أن الحيلة أن يتصدق على الفقير ثم يأمره بفعل هذه الأشياء۔ وقال ابن عابدين: ويكون له ثواب الزكاة وللفقير ثواب هذه القرب۔(الدرالمختار مع ردالمحتار، كتاب الزكوة ، باب المصارف ، ج: 3 ص: 293)