واضح رہے اگر کوئی شخص ازخود والدین کے علاج  معالجہ  پر رقم خرچ کرے تو وہ نہ والدین سے اس رقم کا مطالبہ کرسکتا اور نہ ان کے فوت ہونے کے بعد یہ رقم ان کے ترکہ سے وصول کر سکتا۔

صورت مسئولہ کے مطابق اگر بیٹے نے  ازخود باپ کے علاج معالجہ پر خرچ شدہ اخراجات کو برداشت کیا ہو تو ایسی صورت میں شرعا وہ اخراجات باپ کے ترکہ سےوصولی کا حقدار نہیں ہے،بلکہ یہ والد کے ساتھ احسان و تبرع ہے، جس کا  اسےثواب ملے گا۔

نیز جن بیٹو ں کی شادی مرحوم نے اپنی حیات میں کی تھی ۔وہ مرحوم کا اپنے مال میں تصرف تھا،جبکہ فوت ہونے کے بعد اس کا سارا مال ترکہ بن گیا ہے۔جو کہ تجہیز و تکفین کے ضروری اخراجات، قرض کی ادائیگی اور اگر وصیت کی ہوتو ایک تہائی حصہ سے وصیت کی ادائیگی  کے بعد ورثا میں شرعی حصص کے مطابق تقسیم کرنا ضروری ہے،غیر شادی  اولاد ترکہ میں اپنےحصہ میراث کے علاوہ رقم کا مطالبہ نہیں  کر سکتے ۔

"يبدأ من تركة الميّت بتجهيزه ثمّ ديونه ثمّ وصيّته ثمّ تقسم بين ورثته"(کنز الدقائق، کتاب الفرائض، ص:737، البشری)

"لِأَنَّهُ مُتَبَرِّعٌ بِأَدَائِهِ وَالْمُتَبَرِّعُ لَا يَرْجِعُ."(العناية شرح  الهداية، کتاب الکفالة، ج:4، ص:920، دارالکتب العلمية)