واضح رہے کہ والد کی وفات کے بعد اس کی متروکہ جائیداد قبل از تقسیم ورثا کی  مشترک ملک ہوتی ہے اور فقہاے کرام کی تصریحات کے مطابق اگر کوئی شریک اپنے شرکا کی اجازت سے ملک ِمشترک کی مرمت اور تعمیر وغیرہ کے لیے اس پر رقم خرچ کرے تو خرچہ تمام شرکا  پر ان کے حصص کے بقدر لازم ہوگا،لیکن  اگر کسی شریک نے دیگر شرکا کی اجازت کے  بغیر ملک مشترک پر خرچہ کیا اور وہ ملک مشترک قابل تقسیم بھی ہو تو یہ اس کی طرف سے تبرع واحسان متصور ہوگا،جس کا وہ اپنے شرکا سے مطالبہ نہیں کر سکتا۔ نیز اگر کوئی شریک مشترکہ گھر میں دوسرے ورثا کی اجازت کے بغیر سکونت اختیار کرے، تو اس صورت میں وہ  اپنے ہی حصے میں رہائشی متصور ہوگا ، اس لیے دوسرے شرکا  کے لیے اس سے کرایہ کا مطالبہ کرنا جائز نہیں ۔

            لہذا صورتِ مسئولہ میں 1-اگر بڑے بھائی نے دیگر ورثا کی اجازت کے بغیر والد کے متروکہ گھر میں اپنے ذاتی خرچہ سے کچھ تعمیر کی ہو تو شرعا اس کے لیے یہ جائز نہیں کہ تعمیر پر لگائی گئی رقم کا دیگر ورثا سے مطالبہ کرے ، بلکہ وہ اس صورت میں متبرع شمار ہوگا۔ تاہم اگر اس نے یہ تعمیر اپنے لیے کی ہو تو یہ تعمیر اس کی ذاتی ملکیت شمار ہوگی  دیگر ورثا اس کے ساتھ اس میں شریک نہیں ہوں گے،چنانچہ اگر بڑا بھائی خود یہ گھر خریدنا چاہے تو اس صورت میں جو تعمیر اس نے کی ہے وہ اس کی اپنی ذاتی ملکیت ہے،لہذا اس تعمیر کے علاوہ باقی گھر کی قیمت ادا کر کے اس کو  خرید سکتا ہے۔

2-میراث کی تقسیم فوری کرنی چاہئے اس میں تاخیر مناسب نہیں ہے  ،کیونکہ بسا اوقات تاخیر سے کئی مسائل اور تنازعات پیدا ہو جاتے ہیں۔

3۔اگر دیگر ورثا نے اپنے بڑے بھائی کے ساتھ گھر میں رہنے کی صورت  میں کرایہ کا  کوئی عقد پہلے سے نہ کیا ہو تو ورثا کے لیے اس سے کرایہ  کا مطالبہ کرنا درست نہیں۔تاہم اگر  آئندہ کے لیے ان سے عقد ہو جائے کہ وہ آپ کے حصے میں سکونت اختیار کرنے کا آپ کو کرایہ دیا کریں تو اس صورت میں آئندہ کے لیے کرایہ وصول کیا جا سکتا ہے۔

إذا  عمر أحدالشریکین الملك المشترك ففي ذالك احتمالات أربعة ۔۔۔الاحتمال الثاني :إذا عمر أحدالشریکین المال المشترك للشركة بدون إذن الشریك  كان متبرعا۔۔۔۔الاحتمال الرابع:إذا عمر أحدالشريكين المال المشترك بدون إذن شريكه على أن يكون ما عمره لنفسه فتكون التعميرات المذكورة ملكا له وللشريك الذي بنى وأنشأ أن يرفع ما عمره من المرمة الغيرالمستهلكة،مالم يكن رفعها مضرا بالأرض ففي هذاالحال يمنع من رفعها۔(دررالحكام في شرح مجلةالأحكام،الباب الخامس في بيان النفقات المشتركة،الفصل الاول في تعميرالأموال المشتركة۔۔۔إخ،المادة1309،ج2،ص315)

أما أحد الشريكين إذا سكن مدة في الدار بدون إذن الأخر فيعد ساكنا في ملك نفسه فمن ثم لا يلزم الأجرة لأجل حصة شريكه ۔۔۔ولكن لو حضرالشريك الأخر وتقاضى الأجر من الشريك الساكن فسكن بعد لزمه الأجر عن حصة شريكه۔(شرح المجلة لخالد الأتاسي،الباب الأول في بيان شركة الملك،الفصل الثاني في بيان كيفية التصرف في الأعيان المشتركة،المادة1075،ج4،ص17)