شرعی نقطہ نظر سے کسی کو اپنی زندگی میں کوئی چیز دینے کا وعدہ کرنا یا کسی کو کسی شخص کے بارے میں یہ حکم دینا کہ اسے یہ چیز دے دو ، یہ وصیت میں شامل نہیں۔

صورت مسئولہ میں مرحوم کا اپنے پوتے کو یہ کہنا کہ"میں آپ کو آپ کے والد مرحوم کا حصہ دونگا"  وصیت نہیں بلکہ وعدہ ہے چنانچہ اگر دادا نے اپنی زندگی میں  پوتے کو اپنے مال میں سے کچھ دیا ہو تو درست ہے ورنہ دادا کی میراث میں نرینہ اولاد کے ہوتے ہوئے پوتے کا شرعاً کوئی حصہ نہیں بنتا۔

ایسے ہی مرحوم کا اپنے بیٹوں کو یہ کہنا کہ"میرے پوتے کو اس کے والد مرحوم کا پوراحصہ دوگے"یہ بھی وصیت نہیں ، کیونکہ اس شخص  کی میراث میں  پہلے سے فوت شدہ بیٹے کا شرعاً  کوئی حصہ نہیں بنتا لہذا دادا کے اس قول کا کوئی اعتبار نہیں ،تاہم اگر ورثاء اپنی جانب سےاپنے اپنے حصے میں سے اپنے بھتیجے کو  کچھ حصہ دینا چاہیں تو اس میں کوئی مضائقہ نہیں ۔

فالوصية اسم لما أوجبه الموصي في ماله بعد موته۔ (بدائع الصنائع،كتاب الوصايا،فصل واما بيان معني الوصية،ج7ص333)

فالأقرب يحجب الأبعد كالابن يحجب أولاد الابن۔  (الفتاوى الهندية ، باب الثالث فى العصبات ، ج6، ص451)