واضح رہے کہ کسی شخص کا اپنے ورثاکے لیے وصیت کرنا شرعا جائز نہیں،اس لیے کہ شریعت نے ہر وارث کے لیے اپنا حصہ مقرر کیا ہے جو مرنے والے کی موت کے بعد اس کے زندہ ورثا کو دیا جاتا ہے تاہم اگر کوئی شخص زندگی میں اپنی خوشی اور رضامندی سے مملوکہ مال وجائیداد اولاد کو دینا چاہے توہبہ کرسکتا ہے البتہ ہبہ کے تام ہونے کے لیے یہ ضروری ہے کہ جو چیز ہبہ کی جائے اس پر قبضہ اور تصرف کا مکمل اختیار بھی دیا جائے کیونکہ قبضہ کے بغیر ہبہ پورا نہیں ہوتا ۔

صورت مسئولہ میں اگر مرحوم نے واقعی اپنی زندگی میں کچھ جائیداد اپنے بچوں کو ہبہ کرکے قبضہ بھی دیا ہو تو شرعا اس جائیداد میں میراث کے احکام جاری نہ ہوں گے۔بلکہ وہ انہیں کی ملکیت شمار ہوگی لیکن جو جائیداد مرحوم نے اپنی زندگی میں اپنی ملکیت میں  چھوڑی ہو اور موت کے بعد کسی ایک بیٹے کو وہ جائیداد دینے کا کہا ہو تو شرعا چونکہ وارث کے لیے وصیت کرنا جائز نہیں ۔لہذا اس جائیداد میں سب ورثا اپنے اپنے حصص کے مطابق حقدار ہوں گے۔

( ولا تجوز لوارثه )لقوله عليه الصلاة والسلام إن الله تعالى أعطى كل ذي حق حقه ألا لا وصية لوارث۔(الهداية،كتاب الوصايا، ج4ص639)

  وَلَوْ وَهَبَ رَجُلٌ شيئا لِأَوْلَادِهِ في الصِّحَّةِ وَأَرَادَ تَفْضِيلَ الْبَعْضِ على الْبَعْضِ في ذلك لَا رِوَايَةَ لِهَذَا في الْأَصْلِ عن أَصْحَابِنَا ...عن أبي يُوسُفَ رَحِمَهُ اللَّهُ تَعَالَى أَنَّهُ لَا بَأْسَ بِهِ إذَا لم يَقْصِدْ بِهِ الْإِضْرَارَ وَإِنْ قَصَدَ بِهِ الْإِضْرَارَ سَوَّى بَيْنَهُمْ يُعْطِي الِابْنَةَ مِثْلَ ما يُعْطِي لِلِابْنِ وَعَلَيْهِ الْفَتْوَى.(الفتاوى الهندية،الباب السادس فى الهبة، ج4ص391)