شرعی نقطہ نظر سےنکاح کےانعقاداورصحت کے لیےارکان نکاح(ایجاب وقبول)کی ادائیگی کےوقت گواہوں کا موجودہونابھی ضروری ہے۔ یعنی ایجاب وقبول کے وقت دوعاقل،بالغ،آزاد،مسلمان مرد یا ایک مرداور دوعورتیں موجود ہوں۔اگرعقد نکاح کے وقت گواہان موجود نہ ہوں اورعاقدین بعد میں دو یادو سے زیادہ لوگوں کےسامنے خود کومیاں بیوی ظاہرکریں یاخبردےدیں تو محض اس طرح ظاہرکرنےاورخبردینےسےنکاح منعقد نہیں ہوگا۔

          چنانچہ صورت مسئولہ میں:

1-اگرواقعی لڑکےاورلڑکی نےتنہائی میں بغیر گواہوں کے ایجاب وقبول کر لیا ہو توگواہان موجودنہ ہونےکی وجہ سے یہ نکاح منعقد نہیں ہوا۔اگرچہ بعد میں یہ دونوں لوگوں کو اپنے اس ایجاب وقبول کی خبر دے دیں اس لیے کہ محض خبر دینے سے نکاح منعقد نہیں ہوتا۔بلکہ ازسر نو شرعی گواہا ن کے سامنے باقاعدہ ایجاب وقبول کرنا نکاح منعقد ہونےکےلیے ضروری ہے۔

2-سوال میں مذکورہ صورت حال اگر حقیقت پر مبنی ہو تو شرعاً یہ نکاح منعقد نہیں ہوا ہے۔اب اگر لڑکااورلڑکی اپنی رضامندی سے شرعی گواہان کی موجودگی میں از سرنو نکاح کریں تو نکاح منعقد ہوسکتا ہے۔

3-مذکورہ صورت میں جب نکاح منعقد ہی نہیں ہوا تولڑکی کے انکار واقرا رکا کو ئی فائدہ نہیں۔

قال ولاینعقدنکاح المسلمین إلابحضورشاھدین حرین عاقلین بالغین مسلمین رجلین  أورجل وامرأتین۔(الھدایۃ،کتاب النکاح،ج:3،ص:5،مکتبۃالبشری)

قال: ولو تزوج امرأة بغير شهود أو بشاهد واحد ثم أشهد بعد ذلك لم يجز النكاح لأن الشرط هو الإشهاد على العقد ولم يوجد وإنما وجد الإشهاد على الإقرار بالعقد الفاسد والإقرار بالعقد الفاسد ليس بعقد وبالإشهاد عليه لا ينقلب الفاسد صحيحا.(کتاب المبسوط للسرخسی، کتاب النکاح، باب النکاح بغیر شھود،ج:۵،ص:۳۵)