میراث کے احکام ان اموال میں جاری ہوتے ہیں جو میت کی زندگی میں اس کی ملکیت میں ہوں چنانچہ جو مال بوقتِ وفات اس کی ملکیت میں نہ ہو بلکہ اس کی وفات کے بعد کسی پیکج وغیرہ کی صورت میں اس کے پسماندہ گان کو دیا جائے تو وہ ترکہ میں شمار نہ ہو گا ۔

                صورت مسؤلہ میں مذکورہ شخص کے فوت ہونے کے بعد جو رقم کمپنی کی جانب سے  اس کے پسماندہ گان کو دی جاتی ہے اگر یہ رقم مرحوم کی ذاتی ملکیت  جیسے تنخواہ وغیرہ نہ ہو بلکہ کمپنی اپنی طرف سے بطور امداد یہ رقم دیتی ہو تو شرعا ًاس میں میراث کے احکام  جاری نہ ہوں گے کیونکہ یہ مرحوم کا ترکہ نہیں  بلکہ کمپنی کی جانب سے عطیہ ہے  لہذا کمپنی کی جانب سے جن ورثا  کو یہ رقم دی جاتی ہے وہی اس کے مالک متصور ہوں گے ۔

العطایا لا یورث ۔(شرح الأشباه والنظائر ،ج2ص495)

ولا يصح الصلح والاعتياض لأن الاعتياض عن حق الغير لا يصح ولا يجري فيه الإرث لأن الإرث إنما يجري في المتروك من ملك أو حق للمورث على ما قال عليه الصلاة والسلام من ترك مالا أو حقا فهو لورثته ولم يوجد شيء من ذلك فلا يورث ولا يجري فيه التداخل۔(بدائع الصنائع ،كتاب الحدود ،قبيل مقدار الواجب منها ج9ص250)