عقد اجارہ کی رو سے مستاجر اور اجیر خاص کے درمیان مدت اجارہ کی تعیین ضروری ہے اور مقررہ مدت پورا ہونے سے پہلے کسی معتبر ومعقول عذر کے بغیر کسی کیلئے عقد اجارہ فسخ کرنا جائزنہیں ۔لہذا کسی ادار ے اور ملازم کے مابین ہونے والے معاہدہ ملازمت میں مفاد عامہ کی خاطر عرف کے مطابق یہ شرط لگا نا جائز ہے کہ ملازم مقررہ مدت اختتام سے قبل طے شدہ طریقہ سے اطلاع دیئے بغیر ملازمت چھوڑ کر نہیں جائے گا ۔

صورت مسؤلہ میں:(1)کالج کے انتظامیہ اور اساتذہ کے درمیان ہونے والے معاہدے میں یہ شرط لگانا شرعا جائز ہے کہ "استاذنوکری چھوڑنے سے تین (3)ماہ پہلے ادارہ کے انتظامیہ کو باخبر کرے گا "کیونکہ تعلیمی ادارہ میں بچوں  کے اوقات کو ضائع ہونے سے بچانے کیلئے یہ شرط مصلحت عامہ  کا تقاضہ ہے اور آج کل عرف میں بھی یہ رائج ہے ۔

(2)ادارے کی طرف سے اساتذہ کی تنخواہوں سے مقررہ مقدار میں جو رقم سیکیورٹی کے طور پر کاٹی جاتی ہے درحقیقت یہ ادارے کے ذمے اساتذہ کا دین ہوتا ہے جو کہ ابھی تک اساتذہ کی ملکیت میں نہیں آیا ہے  بلکہ تاحال یہ رقم ادارے ہی کی ملکیت میں ہے اس لئے شرعا ادارے کا انتظامیہ  اس کو کالج کے دیگر ضروریات ومصالح  میں خرچ کر سکتا ہے ،تاہم معاہدہ ملازمت  کے اختتام پر یہ رقم دین ہونے کی وجہ سے اساتذہ کو حوالہ کرنا ضروری ہو گا ۔

(3)سیکیورٹی رقم چونکہ اساتذہ کی ملکیت  میں نہیں ہو تی اور نہ ہی اس  میں ان کو مالکانہ تصرفات کا اختیار ہو تا ہے لہذا شرعا ادارے  کیلئے ان رقوم میں ہر جائز تصرف اور نفع بخش انوسٹمنٹ جائز ہے اس سے آنے والے منافع ادارے  کی ملکیت  شمار ہو گی ۔

 لو آجر نفسه في عمل أو صناعة ثم بدا له أن يترك العمل لم يكن له ذلك وإن كان ذلك العمل ليس من عمله وهو مما يعاب به كان له الفسخ۔ (الفتاوٰ ی الھندیۃ،کتاب الاجارۃ،الباب التاسع عشرفی فسخ الاجارۃ بالعذر،ج 4ص499)

الاجارۃ بعد ما انعدمت صحیحۃ لایسوغ  للآجرفسخھا۔ (دررالحکام،کتاب الاجارۃ،المادۃ441،ج2ص480)

وأطلق الملك فانصرف إلى الكامل وهو المملوك رقبة ويدا فلا يجب على المشتري فيما اشتراه للتجارة قبل القبض۔ (البحر الرائق ،كتاب الزكوة،ج2ص355)