جب بائع اورمشتری  باہمی رضامندی سے  کسی چیز  کی بیع طے کرلیں اور طرفین سے ایجاب وقبول ہو جائےتو بیع تام ہو جاتی ہے اس کے بعد مشتری کے ذمے  ثمن ادا کرنا لازم  ہوتا ہے اور بائع کے ذمے  مبیع  حوالہ  کرنا ۔انعقاد بیع کے بعد انتقال ملک  کے  قانونی  تقاضے پورے کرنا  بہتر ضرور ہے  لیکن شرعا ثبوت ملک  اس پر موقوف نہیں ۔

                 لہذا صورت مسؤلہ میں  اگر مشتری نے واقعتا 8750000کے عوض   زمین خریدی ہو اور 66لاکھ روپے  ادا کرکے زمین کا قبضہ لے لیا ہو  تو ایسی صورت  میں شرعا اس زمین کی بیع  تام ہوئی تھی ۔اور مشتری کے ذمے بقیہ رقم کی ادائیگی اور فروخت کرنے  والوں کے ذمے  انتقال کرنا لازم تھا  تاہم جب کاغذی انتقال مقررہ مدت میں نہ ہو سکا  اور جرگہ کے فیصلے کے مطابق وہ زمین  انہی فروخت کرنے  والوں میں سے  ایک نے سائل سے خرید لی  اور اس کو 80 لاکھ ادا کیا   تو چونکہ یہ ایک مستقل  علیحدہ بیع   ہوگئی  اس لیے اس میں  سائل کو   مبلغ 14 لاکھ  روپے  کا جو نفع حاصل ہوا وہ اس کیلئے حلال ہے ۔

واذا حصل الإيجاب والقبول لزم البيع ولا خيار لواحد منهماإلا من عيب أو عدم رؤية ۔(الهداية،كتاب البيوع،ج3ص20)

وأما حكمه فثبوت الملك في المبيع للمشتري وفي الثمن للبائع إذا كان البيع باتا۔(الفتاوى الهندية،كتاب البيوع،الباب الاول في تعريف البيع۔۔۔ج3ص6)

(البيع) ھو مبادلۃ المال بالمال بالتراضی ۔(البحر الرائق ،کتاب البیع ج5ص430)