شرعی نقطہ نظر سے ہر وہ چیز   جو کسی کے پاس  بطور حفاظت موجود ہو چاہے مالک نے  اپنی رضامندی سے بطور امانت اس کے پاس حفاظت کے لئے  رکھی ہو یا کسی عقد کے ضمن میں اس کے پاس امانت ہو ،  جیسے: عاریت یا اجرت پر لی ہوئی چیز  ،  یہ   اشیاء  امانت کے حکم میں  داخل ہیں چنانچہ  اگر کسی کے پاس کسی شخص   نے مقررہ مدت تک امانت رکھوائی ہو اور اس مدت مقررہ تک وہ شخص اپنی امانت و صول کرنے نہ آئے تو ایسی صورت میں اگر امین کو مالک کا پتہ معلوم ہو تو وہ مال اس شخص تک پہنچا دے اور اگر مالک کا پتہ معلوم نہ ہو تو یہ مال تب تک امین کے پاس بطور امانت پڑا رہے گا  جب تک مالک خود یا اس کے ورثاء آکر وصول نہ کر لیں لہذا اگر امین  کا اس مال کی حفاظت پر کوئی خرچہ  آتا ہو تو  وہ مالک سے لینے کا حقدار ہوگا۔

          صورت مسئولہ کے مطابق   اگر چار ماہ کی مقررہ مدت تک مالک آکر اپنا مال وصول نہ کرے تو ایسی صورت میں اول تو مالک کو مال کے وصول کرنے سے متعلق مطلع کیا جائے پھر اگر وہ تساہل سے کام لے تو    اگر اڈہ والوں کو مالک کا پتہ معلوم ہو   تو بہتر یہ ہے کہ   مال  مالک تک پہنچا دیں اور جو  خرچہ  آئے وہ مالک سے وصول کریں    اور اگر اڈہ والے مال نہ پہنچائیں بلکہ مال اڈہ میں ہی پڑارہے یا مالک کا پتہ معلوم نہ ہو تو ایسی صورت میں یہ مال بطور امانت اڈہ والوں کے پاس پڑا رہے گا  چنانچہ وقت مقررہ کے بعد  اگر اس مال کی حفاظت پر کوئی  اضافی خرچہ آتا ہو تو  اڈہ والے مالک سے  یا مالک کے بالکل غائب ہونے کی صورت میں اس کے مال سے  وہ خرچہ  وصول کرنے کے حقدار ہونگے۔

          نیز یہ کہ  طرفین  کے عقد کے وقت اڈہ والوں کے لئے ضروری ہے کہ وہ مالک کا مکمل پتہ معلوم کریں  تاکہ  مالک کے  مال وصول نہ کرنے کی صورت میں مالک تک مال پہنچانے یا مال کے وصول کرنے سے متعلق مالک کو اطلاع دینے  میں دشواری نہ ہو ۔

غاب المودع ولا يدري حياته ولا مماته يحفظها أبدا حتى يعلم بموته وورثته كذا في الوجيز للكردري ولا يتصدق بها بخلاف اللقطة۔  (الفتاوى الهندية ، الباب السابع فى رد الوديعة ، ج4 ، ص354)