شریعت میں استحقاق ارث ایک اضطراری حق ہے۔اس لیے کوئی شخص اپنی  طرف سے اس حق کو ختم نہیں کرسکتا۔اگر باپ کسی بیٹے کو عاق کرے تو اس سے وہ میراث سے محروم نہ ہوگا۔چنانچہ عاق شدہ بیٹا بھی میراث کا حقدار ہوگا۔تاہم اگر باپ نے زندگی میں اپنی سب جائیداد اور مال ودولت دوسرے ورثا میں تقسیم کرکے ان کو قبضہ دے دیا ہو۔اور عاق کردہ بیٹے کو کچھ بھی نہ دیا ہو تو پھر باپ کے مرنے کے بعد عاق شدہ بیٹے کو مطالبہ کا حق نہیں۔نیز وارث کے حق میں وصیت واجب العمل نہیں۔شریعت نے ورثا کے لیے  حصے مقرر کیے ہیں اس لیے وارث کے حق میں وصیت شرعا معتبر نہیں۔

صورت مسئولہ کے مطابق باپ کا کسی بیٹے کے خلاف ایسا عاق نامہ لکھنا جس میں وہ موت کے بعد وراثت سے محروم رہے جائز  نہیں اور نہ اس کی وجہ سے بیٹا محروم ہوتا ہے۔اسی طرح بیٹے کے لیے وصیت نامہ لکھنے کی کوئی حیثیت نہیں جب تک دوسرے ورثا  اس کو جائز قرار نہ دیں۔

الارث جبریی لا یسقط بالاسقاط۔(تکملۃ ردالمحتار،کتاب الدعوی ج11 ص678)

(ولا تجوز لوارثہ)لقولہ علیہ السلام "ان اللہ اعطی کل ذی حق حقہ،الا لا  وصیۃ للوارث"ولانہ یتاذی البعض بایثار البعض ففی تجویزہ قطعیۃ الرحم۔(الھدایۃ ج4ص640،639)