واضح رہے کہ نکاح صرف طبعی خواہش وشخصی ضرورت کی تکمیل ہی نہیں بلکہ ایک عبادت ہے ،اس لیے اس میں شرعی اصول کی پاسداری نہایت ضروری ہے ،اور کسی ناجائز رسم ورواج کی بنا پر اس کو شریعت کے اصول سے متصادم بنانادرست نہیں ۔مثلاً لڑکی کےنکاح کے بدلے ،لڑکے کے والدین سے مہر کے علاوہ اپنے لیے اضافی رقم کا مطالبہ ایک ناجائز عمل ہے۔عموماً ایسی صورت میں لڑکایا اس کے  والدین مجبور ہوکر بادلِ ناخواستہ رقم ادا کرتے ہیں،کیوں کہ اس کے بغیر معاشرے میں کوئی اس کو رشتہ دینے پر آمادہ نہیں ہوتا ،بعض لوگ اس آمدنی کو مہر کا نام دےکردوسرے كے  مال کو ہڑپ کرنے کے لیے حیلہ بازی کرتے ہیں کہ یہ مہر ہے اور بیٹی کی رضامندی سے ہمارے لیے اس کا استعمال جائز ہے ،جبکہ حقیقت میں یہ ایک ناکام حیلہ ہے جس سے مراد پیسے کاحصول ہے نہ کہ مہر کا تقرر، فقہائے کرام نے اس کو رشوت قراردیا ہے اس کو واپس کرنا ضروری ہے ۔ تاہم اگر لڑکی کے والدین مہر کے طور پر رقم مقرر کرکے نکاح کے بعد رخصتی سے قبل وہ رقم وصول کریں اور اس رقم سے لڑکی کی اجازت سے اس کے لیے جہیز وغیرہ کا سامان خریدلیں، تو شرعاً اس کی گنجائش ہے ۔

(أخذ أهل المرأة شيئا عند التسليم فللزوج أن يسترده) لأنه رشوة. (قوله عند التسليم) أي بأن أبى أن يسلمها أخوها أو نحوه حتى يأخذ شيئا، وكذا لو أبى أن يزوجها فللزوج الاسترداد قائما أو هالكا لأنه رشوة۔(ردالمحتار مع الدرالمختار ، كتاب النكاح ، باب المهر ، ج: 4 ص: 307)