واضح رہے کہ  بلا ضرورت تصاویر کھینچنے یا رکھنے کی حرمت  احادیث ِمبارکہ سے ثابت ہے، چاہے وہ تصاویر ہاتھ سے بنائی گئی  ہوں یا ڈیجیٹل کیمرے سے ۔جہاں تک تصویر  دیکھنے کا مسئلہ ہے تو بنیادی طور پر اس کے ناجائزیا جائز ہونے کا مدار فتنہ  میں پڑنے اور نہ پڑنے پر ہے،چنانچہ  اگر تصویر کے دیکھنےسے فتنہ میں  پڑنے کا اندیشہ ہو یا وہ تصاویر فحاشی و عریانی کی ترجمانی کرتے ہو ں تو اس صورت میں ان کو دیکھنا جائز نہیں جس طرح خارج میں ان کو دیکھنا ممنوع ہے۔لیکن اگر تصاویر میں موجود صورتوں  کو خارج میں دیکھنا فی نفسہ جائز اور مباح ہو تو تصاویر میں بھی ان کو دیکھنے کی گنجائش ہےبشرط یہ کہ تلہی و تلذذ کی نیت نہ ہو ،کیونکہ ممنوع عوارض کی وجہ سے مباح الاصل چیز بھی شرعاً ممنوع و مذموم ہوتی ہے جس سے اجتناب ضروری ہے۔

             صورت ِمسؤلہ میں تصویردیکھنےکی مندرجہ ذیل صورتیں ہوسکتی ہیں:(1)کسی حیوان کی تصویر ہو۔شرعاً ایسے تصویر کو دیکھنا جائزہےتاہم حیوانا ت کی تصاویر کو محفوظ کرکے رکھنا جائز نہیں۔(2)تصویر کسی انسان کی ہو ۔اس صورت میں تلہی و تلعب اور تلذذواستمتاع کی خاطر اس کو دیکھنا جائز نہیں ۔لیکن اگر ایسی تصویر کو دیکھنے سے مقصود تلہی وتلذذ حاصل کرنا نہ ہواور نہ ہی اس کی وجہ سے قوت ِشہوانیہ  پروان چڑھتی ہو تو اس صورت میں اگر خارج میں اس کی طرف  نظر کرنا حلال و مباح ہوتو تصویر میں بھی اس کو دیکھنے کی گنجائش ہے۔(3)اگر تصویر نامحرم خواتین کی ہو یا  فحش مناظر پر مشتمل ہو تو شرعاً ایسے مناظر اور تصاویر دیکھنا جائز نہیں۔

            فتاوی عثمانیہ ج10ص344میں تصویر دیکھنے سے متعلق جو حکم "جن تصاویر کابنانا اور گھر میں رکھنا ناجائز ہےان کا ارادہ اور قصد کے ساتھ دیکھنا بھی ناجائزہے"مذکور ہے یہ ان صورتوں پر محمول ہے جہاں پر تصویر کے دیکھنے سے قصد وارادہ  تلہی وتلعب ہویاوہ فحش تصاویر ہوں یاتصاویر نامحرم عورتوں کی ہو ں اور اس کے دیکھنے سے فتنہ میں پڑنے کا اندیشہ ہو تو ان صورتوں میں ان کو دیکھنا ممنوع ہے۔علاوہ ازیں فتاوی عثمانیہ کے ج10ص346میں مذکور تفصیل"ڈیجیٹل تصویر دیگر تصاویر کے حکم میں ہے۔۔۔" تصویر بنانے سے متعلق ہےلہذا کسی معتد بہ ضرورت کے بغیر ڈیجیٹل تصویر بنانا یا کھینچوانا جائز نہیں۔

وظاہر کلام النووی  فی شرح صحیح مسلم الاجماع علی تحریم  تصویر صورۃ  الحیوان۔(البحر الرائق،ج2ص29)

الضرورات تبیح المحظورات۔(الاشباہ والنظائرلابن نجیم ؒ،ص72)

( وحرم الانتفاع بها )أي بالخمر ولو لسقي دواب أو لطين أو نظر للتلهي۔(الدر المختار،فصل الشرب،ج6ص449)